Isaya 8 - Angami Naga CL (Re-edited) Bible (BSI)

Isaya Nuou Pie Themiako la Zasi Puo Chükeshü

¹ Süsie Jihovae a ki, kethulhe kezha puo pielie di süu gei mia bu phrülie kerüü nu “Maher-shalal-hash-baz vie” ikecü thushülie;

² mu a la pelelie kesü Uria zievo-u mu Jeberekia nuou Zakaria unie bu süu zhapu chüshülie.

³ Mu a siedzekesipfü ki vo, ru puo nuonipfülie di thepfunuomia puo penuolie, sitse Jihovae a ki, Puo za pie Maher-shalal-hash-baz chülie,

⁴ kekreilamonyü unuoe “Apuo,” morei “Azuo” ikecü kielie kemonu Asiria kediu bu Damaska kinyiko mu Samaria vie vapfü tuotatuo.

⁵ Jihovae a ki pu la di:

⁶ Kekreilamonyü themia hako Shiloa dzü kru mele mo kezhüu lie mvü di Rezin mu Remalia nuou mhodzü michie rüsürüsate;

⁷ süla, Niepuue uko gei Kerü dzüu kuo phi mu kra phikecü Asiria mu puo kevi pete se vortuo; sidi dzücha pete tshuzietuo, di puo khieko mho sietuo;

⁸ süue dzüdi tuoi Juda nu kru tsutuo, ketshukezie chü kho puo vo tsotuo; mu puoshü kelhakeshü n kijü zhau tshutuo, he-i Immanuel.

⁹ Nieko themiako, kengu voliecie, di thedzükoutacie; rünyüliecie, nie ketsekethou rüna pete; nie chie phalie di thedzükoutacie; nie chie phalie di thedzükoutacie!

¹⁰ Keze mha rhükekiecie, derei süu kemethuo chütatuo; die pushücie, derei süu thalie lho, Ukepenuopfüe hie ze tuokecü la.

¹¹ Jihovae puo dzie kuo phikecüu pie a gei shü di a bu themia hako cha nu tuo hienu di a ki hakemhie pushü:

¹² Themia hakoe pekhrerüshü üdi puyakecü pie pekhre rüchü üta hie, mu ukoe preiyakecüko prei, morei merieta hie.

¹³ Derei krodiko Jihova, nie puo üse mesa ütuo; nie puo preiürhukecü chülie.

¹⁴ Siro puoe kemesachü puo, mia petsoukecü tsie puo chütuo, kekreilamonyü Israel ki kenienie la thephi kemesü puo mu Jerusalempfüko la kebie puo tsiu ciephrie puo chütatuo.

¹⁵ Tsiu uko mia kekra u phi mesütuo; uko tetsu di protatuo; mu uko malie di tezetatuo.

¹⁶ Zhapuu phalie, mu a siedziko donu kepethadieu mohor vüwalie.

¹⁷ Ae Jihova pfhe batuo, mu a puo khremerü batuo; Jakob ki nu puo zie kevie kebau.

¹⁸ Harie, a mu Jihovae se a tsükeshü nuonuoko ha krodiko Jihova Zion kijüthou gei bayakecüu kinu kepar Israelko donu zasiko mu u ngoko kro puo zotuo.

¹⁹ Mhanuü mia n ki, “Themoumia mu thuophimia mecu mu mebe kebako rüsacie,” ilie ro themiakoe u rhuoko rüsa zhü mo üme? Kerheimia la kesiako rüsa zhü me?

²⁰ Kepetha mu ketarhoketuo la? si. Derei hakemhie kepumia teiso kevor ngu lho tou zo.

²¹ Ukoe kijüu pfüthe votuo, kemezhie se mu merü di; siro ukoe merülie ro, uko nou meyie di uko kediu mu uko rhuoko rüsetuo. Ukoe uko zie kereipie pesotsa vatuo,

²² mu ukoe kijüu mehoshütuo, derei ukoe kemezhiekecü siro kezei, meyhumezhiekecü, thedzükezei rübei ngutuo; mu uko nepie zeibouicüu nu shüwatuo.