Isaya 7 - Angami Naga CL (Re-edited) Bible (BSI)

Isayae Kediu Ahaz Chü Kethepfukeshü

¹ Uzia nuo Jotham, Jotham nuou Ahaz-e Juda mho kedi chü keba ki, Aram kediu Rezin mu Remalia nuou Pekae Israel kediu Jerusalem whuotuoü khor, derei puo whuolie mota.

² Siro Siriae Efraim ze kezhawhe ketha David kiue sishü tse, Ahaz mu puo themiako melou rüniepie ketsa nu seiboko teikhrie bu uko he keniekeshü tuoita.

³ Sitse Jihovae Isaya ki pu di, no mu n nuou Shear-Jashub nnie pra rüzie peso-u dzüyie thela ki Pfhekemenyi Lieu nu kevo chau nunu Ahaz ze kesecie,

⁴ di puo ki hakemhie pushücie, Menuolie, sei mu zei balie, michie hie, siro mi bu thekecü do hanieha la n melou thachüta hie, Rezin mu Aram siro Remalia nuou nouyie thuo kemerie chü ba zo rei.

⁵ Kekreilamonyü Aram-e Efraim mu Remalia nuou zelie di n ngukemvü mha kesuo rhü di sie,

⁶ “Úko kho Juda petsou mu Jerusalem dathewa khe, sidi puo penyüpie u vie chülie di Tabil nuou bu sünu kedi chüshü khe iba;”

⁷ süla Niepuu, Jihovae pucü: Süu thalie lho, mu süu chü vorlie lho,

⁸ Aram tsüu sü Damaska, mu Damaska tsüu sü Rezin zo eru. (Cie hiesorouepengou nu Efraim-e pro phata di themia chü ba motatuo.)

⁹ Siro Efraim tsüu sü Samaria, mu Samaria tsüu sü Remalia nuou zo. Niekoe peletsa thalie moro, nie mhakipuorei thalie lho zo.

Isayae Immanuel Dze Kepu

¹⁰ Jihovae Ahaz ki pu la di sie,

¹¹ Jihova nie Kepenuopfü ki zasi puo chalie; süu bu Sheol kesou de soulie morei teigei de rükrielie.

¹² Derei Ahaz-e pu di, a chalie lho, mu a Jihova kedolie lho, si.

¹³ Sitse Isayae sie, “Siro rünyüliecie, David kiu! Nie themia keyhukecü we mhatho mo üdi, nie Ukepenuopfü rei keyhuya me?

¹⁴ Süla Niepuu puo thuo zasi puo pie nie tsütuo. Harie, rüümiapfü puoe nuonipfü tuote mu thepfunuomia puo penuoshütuo, mu puo za thopie Immanuel chütuo.

¹⁵ Puoe kesuou melie mu keviu keda si kepar ki, puoe thunudzükhie mu mepfhidzü cütuo.

¹⁶ Kekreilamonyü u nuoyoe kesuou melie mu keviu keda silie kemonu, noe prei keba kedinie kijü ruotatuo.

¹⁷ Jihovae no mu n themiako tsiu n puotsanuo kiu gei, Efraim-e Juda ze kekhoketa sie vor mo zoluokecü teisozha puo, Asiria kediu ze vorshütuo,” sita.

¹⁸ Sünhie Jihovae Ijipt nu kerüboko nu keba teizieko mu Asiria kijü nu keba mepfhi la mesushütuo.

¹⁹ Sitse uko pete vor koure kesouko nu mu tsiekrie kerükoko nu mu ronyhoko pete nu mu perituoko pete nu batatuo.

²⁰ Sünhie Jihovae Asiria kediu ze di Kerü lutsakhie nu tsüpfü nyiekelieu pie u tsütha tsiu u phimie thiewatuo, mu süu u tiemie rei thie juwatuo.

²¹ Sünhie mia puo thuü yopuo mu tekuo kenie perituo,

²² mu sükoe thunudzü kha phikeshü la, puo dohi cütuo; kijüu nu lhiepie keba kehoupuorei thunudzükhie mu mepfhidzü cütuo.

²³ Sünhie khubero nyie puo keba raka shekel nyie puo ma kijüko, huphienuo mu zohunyho chütatuo.

²⁴ Mia puo theü mu theütsie pie di sünu vortuo, kijü pete huphienuo mu zohunyho chütaketuo la.

²⁵ Siro kejü pie cieyakecü kijükhru peteko nu huphienuo mu zohu keprei la nie vo motatuo; sidi peri bu tuo mu tekuo bu kedekecü kijü chütatuo.