Isaya 66 - Angami Naga CL (Re-edited) Bible (BSI)

Ukepenuopfü Rüsuonu Chakecü

¹ Jihovae puya: Tei sü a kediba, mu kijüu a phipra; nieko a la chüketuo kiu, mu a kerüleichüu kedipuo mu?

² Mha hako pete a dzie thuo chüshü, mu süla mha hako pete a vie, Jihovae siya. Derei a haikecü themiau mehotuo, puo nou rünuo mu puo ruopfü nouzhie nyi di a die si di pekecüu.

³ Thudo kedukhriue themia puo kedukhri mhie zo; tekuonuo puo pie ruosuo kechüue, tefü puo vo biethekewa mhie zo; thoulha se ruosuo chükeshüue thevo zie khakeshüu mhie zo, kethengu pie kerükra ruosuo chükeshüue japie terhuorhi puo ketsüu mhie zo. Hako we u thuo u chako kedaliete, mu ukoe kerütsekecüko u neiya.

⁴ A rei ukoe krenyüketuou kedashütuo mu uko prei kebau se uko gei vorshütuo; kekreilamonyü, ae kiekeshü ki, miapuorei a pfhekho mo, a die pukeshü ki, uko rünyü mo, derei ukoe a mhinguki suokecüu chü, mu a nei kemo-u kedalie.

Jihova Zion Kelashü

⁵ Jihova dieu rünyüliecie, nie puo die gei peyakezhako: N themia thuo n ngumecü mu a za la n khawakecüko hakemhie pu di, “Jihova pie zapuzayie chüshü, sitse hie nie kenei ngutuo” siya; derei thenga chüketuo we uko zotuo.

⁶ Rünyüliecie, nadi nunu mevükhoukecü puo! Rüsuoki nunu mhapfhe puo! Jihova pfhe, zhakhra pie puo ngumvüko tsüzhie!

⁷ Puoe nuonuovachü vor kemonu puoe penuolie; puo gei vachüu vor kemonu thepfunuomia puo penuolie.

⁸ Supuonie mha haikecü si ga? Supuonie mha haikecü ngu ga? Kijü puo khunhie nu penuolietuo me? Vapuonu seyie puo pesielie vi me? Sishierei Zion nuonuovachü chülie mumetha puo nuonuoko penuolie.

⁹ A nuobvüu khrüshü di penuoshü motuo me? Jihovae siya; a penuokecü chüshüyakecüu, nuobvüu khawatuo me? Nie Kepenuopfüe siya.

¹⁰ Jerusalem ze nie dzüzielie, mu puo la nie neiliecie, nie puo khrieyacü pete, kenei nu puo ze nie neiliecie, nie puo krükrakecü pete.

¹¹ Nie bu puo gei thukepeluo nuu nu di nie thekelie mu ketheguolieketuo la; nie bu puo kinyi ketshukelhuo kechüu nunu nie nei di krie kenyü krielieketuo la.

¹² Süla Jihovae puya: A kruokelie bu kerü puo tuoi puo ki vortuo, mu seyieko kinyi bu rücü dzü tuoi ketshukezie chü kru puo ki vortuo; siro nie bu nutuo, puo tsei geinu nie pietuo, mu puo do geinu nie yukrituo.

¹³ Miazuonuoe puo nuoyo nou thupeluokecü tuoi, sütuoi a n nou thupeluotuo; Jerusalem nu n nou thupeluotuo.

Ukepenuopfü Kedi mu Noupfhü

¹⁴ Niekoe ngutuo, mu nie nou rei puo neituo; nie moko nha tuoi lhou pevilietuo; mu Jihova dzieu puo kituoko zetuo ücü, tsiu puo noupfhüe puo ngumvüko perhietuo ükecü sitatuo.

¹⁵ Kekreilamonyü Jihovae mi nunu vortuo mu puo kierbageiko geinu khriedi mhie vortuo, puo noupfhü nu puo nouyie khashütuoü, mu puoe miü nunu mia kerhieshütuo üdi.

¹⁶ Kekreilamonyü Jihovae mi nunu mu zhiecha pie chüüphou chükepfü khe capi chütuo, mu Jihova dzie nu siakecü kra phituo.

¹⁷ U thuo u chü kemesa se tezie nu vo di puo metsuou nu kethau, mu thevochü siro kerütsekecü mu zukhranuo cü kebako jü kemethatatuo, Jihovae siya.

¹⁸ Ae uko mhathoko mu noudoko si keba la, tsiu ae seyie pete mu u die kekreikecü pete pfhü kengutuo üdi vorzhie; mu ukoe vor a zayieu ngutuo,

¹⁹ siro ae zasi puo pie uko donu shütuo, siro uko donunu ae lhiekelieko ketsepie seyieko, Tarshish, Pul, mu Lud nu theü seyakecüko ki Tubal nu Javan nu, kepecie dzü khie kijüko a za kemeyie si mo mu a zapuzayie nguya kemoko ki shütuo, tsiu ukoe a zapuzayie pie seyieko donu pesishütuo.

²⁰ Siro Israelkoe thoulha pie mekhou kemesa puo nu shülie di ruosuo la se voryakecü tuoi, ukoe seyie peteko donunu Jihova tsütuo üdi kier geinu, mu bagei geinu, mhabouko geinu mu gada geinu mu utko geinu uko siezedzürieko ze a kemesa kijüthou Jerusalem gei vortuo, Jihovae siya.

²¹ Siro ae uko huomia bu zievoko mu Levimia chüketuo la a uko zelietuo, Jihovae siya.

²² Kekreilamonyü a tei kesa mu kijü kesa chüshütuo ücü, a mhodzüki batuo, sümhie n nuosenuoyieko mu n za rei batuo, Jihovae siya.

²³ Khrülhou nunu khrülhou ketso, mu sabat nunu sabat ketso, themia pete vor a mhodzüki nu rüsuotuo, Jihovae siya.

²⁴ Sitse ukoe tuo pra a ngumvü di a petsouketa kesiamoko mehotuo; uko khuko sialie lho, uko mi mhetalie lho, mu uko themia pete mhodzü kerütse chütatuo.