Isaya 65 - Angami Naga CL (Re-edited) Bible (BSI)

Kerüzhü mu Mia Die Ze Kemo Siazha

¹ A a ketso kemoko bu a pfhütuoü, a pfhü kemoko bu a ngutuoü, dojüpfü ba. Ae, “A haki ba, a haki ba” idi a za kie kemo seyie puo ki pu.

² Ae a dzienie chapie themia mia die ze kemo kro puo ki cha, u thuo u medo chü di vi kemo cha nu tuoyakezha la;

³ tezie nunu ruosuochü, mu ita geinu kethengu the di, a zie kinu a nei kemo chü sei bayakezhako,

⁴ ukoe mekhruko nu baya, mu theva gei kepekhre chüko nu baya; thevochü cüya, mha kerütseko chapie uko liko nu baya,

⁵ ukoe “Nie thuo nie kereilie, a penuo vor hie, ae mesathorcü la” iya. Hauha a nyhüki nu mikhu puo zo, zhate tu keba mi puota zo.

⁶ Harie, a mhodzünu hau thupie zhüte: a kemekrie balie lho, derei a khepu lie latuo;

⁷ uwe, ae uko kejoko mu uko puonuoko kejoko zhakhra chü kesapie uko do gei shütuo, Jihovae siya; ukoe kijüthouko gei mhare kethengu ruosuo thekecü la, mu kijükhruko geinu a zha sekecü la, ae uko mhathoko la zhakhra mejüpie uko do gei shütuo.

⁸ Jihovae puya: Khubesi phro mu khubedzü bayakecü tuoi, mu ukoe, “Süu bie pesuowa hie, theja sünu baya,” iya. Süla a a kituoko la mhachütuo, mu uko pete bie pesuowalie lho.

⁹ Ae Jakob geinu puoyie se parshütuo, mu Juda geinu a kijüthouko kayie se parshütuo; ae kedakelieko süu wetuo, mu a kituoko sünu lhoutuo.

¹⁰ Sharon nu tekuokroko bu nhaliecü tuo, mu Akor razhau pie thukro bu kezhü chü puo chütuo, a themiako a pfhükelie la.

¹¹ Derei nie Jihova khawaketako, a kemesa kijüthouu rükra moketako, nie kinyi la mizhü keseyakecüko, mu thiesie dze la zu kereipie tehie nu keshüko;

¹² A nie khapie zhiecha tsüwatuo, mu nie pete kedukhriu nu nuketsutuo, kekreilamonyü, a n kiekeshü ki, no a pfhekho mo, a die pukeshü ki, no rünyü mo, derei no a mhinguki suokecüu chü; mu a neiya kemo-u kedaliete.

¹³ Süla Niepuu Jihovae puya: A kituoko mhacütuo, derei nieko we merütuo; a kituoko mha krietuo, derei nie we terhütuo; a kituoko u neituo derei nie bu thenga chütuo,

¹⁴ a kituoko u nou u kenei la kelituo, derei nieko we nie noukemezhiekecü la ruorüituo, mu nieko ruopfü meyhumezhiekecü la kratuo.

¹⁵ Nie-e nie za pie rüse puo tuoi a kedakelieko ki shüwatuo, mu Niepuu Jihovae nie dukhriwatuo; derei puoe theza kekrei puo se puo kituoko tsütuo.

¹⁶ Sidi kehoupuorei kijü nu theja cha ro kemiatho Kepenuopfü thuo japie tsütuo, mu kehoupuorei kijü nu rüsekecüu kemiatho Kepenuopfü thuo rüse pie tsütuo; kekreilamonyü thiedzü mezhieko rükra mote mu a mhi kinu kevieliete.

Tei Kesa mu Kijü Kesa

¹⁷ Kekreilamonyü a tei kesako, mu kijü kesa puo chüshütuoü bate, thiedzü vieko rükra sa motatuo morei u sie lelie lho.

¹⁸ Derei a chükeshüu gei kechachie u nei mu u nei lhe moliecie; kekreilamonyü a Jerusalem chüpie u kenei puo, mu puo themiako pie thedzükezie puo chüshütuo üzhie.

¹⁹ A Jerusalem nu a neituo, mu a themiako la a neituo; sünu krakecü pfhe si salie lho, morei kemezhiekecü la shiekecü si salie lho,

²⁰ Sünu nuoranuomia zha huoyo rübei lhoukecü chü lho, morei ketsamia puo kelhouzha lhou tso kemo ba salie lho, kekreilamonyü cie krie puo lhou di siakecüu pie u khriesarüü teiki zoluo ütuo, mu cie krie puo tso mo di siaketau pie rüsepfüta ütuo.

²¹ Ukoe ki chü di süko nu lhoutuo; ukoe khubelie cieshü di puosi cütuo,

²² Ukoe ki chüshü di mia bu baketa chülie lho; uko leishü di mia bu cükecü chülie lho; a themiako kelhouzha rei seiboko kelhouzha tuoi zotuo eru, mu a kedakelieko telhekecha uko dzie mhathoko la ketheguotuo.

²³ Ukoe kemethuo mezhie chülie lho, morei hieshie chütuo üdi nuo penuolie lho; ukoe uko nuonuoko sa di Jihova japie tsükeshü nuonuo chütuocü la.

²⁴ Ukoe kie kemonu ae khoshütuo, uko pu pedzeyaluokecü nu a silietatuo.

²⁵ Socie mu tekuonuou keze nha cütuo, Loshae thudo tuoi rügu cütuo; derei nyophe pie tinyhüu ca chütuo. A kemesa kijüthou gei uko bie pechü morei pesuolie lho, Jihovae siya.