Isaya 63 - Angami Naga CL (Re-edited) Bible (BSI)

Edom gei Khepukelie

¹ “Edom nunu vorkezhüu, Bozra nunu kemeriedzü pie vakepfü pfhemenei keseu ha supuo mu? Puo pfhe puo nei mesümedekecüu, puo kekuo nyi phi di tuokezhü hau supuo ga?” “Süue A zo, kemezhü shiekeshüu, kuo phi di kelalie keviu.”

² “Kiüdi n pfhedzieu merie, mu n pfhenei khubedzü thetuo üdi kedekecümia pfhenei tuoita ga?”

³ “A rübei di khubedzü kegeu kede, mu themiako donu miapuorei sa mo; a a nouyie nu uko kede mu a noupfhü nu uko menyü; süko dzü pie a pfheneiko vawa, mu a pfhenei pete dawate.

⁴ Khepu teisozhau a nou ki tuoketa la, mu rhakelie a mhatho teicieu vorte.

⁵ A meho sie, derei kekhruohi puorei tuo mo; a meho terüshü, derei miapuorei a memhipiekelie jü; süla a bou thuo kuokelie se vor a tsü; mu a noupfhü thuo a memhipielie.

⁶ A a nouyie nu themiako kede, a a noupfhü nu uko bienyiewa, mu a uko zie rupie kijüu gei shü.”

Jihova Ketseikevi Rükrakeshü

⁷ Jihova a ngumezhiekeshü thoko, Jihova tshelie kesü mhathoko phrü lashütuo, kekreilamonyü süko pete Jihovae u la chüshü, mu puo ngukemezhie ki ze, puo kekhrie tshupfü di rüdi kemo ki ze, Israel kiu ngu puo nei phikecü se uko pekieshü.

⁸ Puoe sie, “Uko sü a themia ketho zo, cürü di mhachülie kelho nuonuoko,” siya. Sidi puo uko kelakelieu chüta,

⁹ uko mezhie pete nunu. Dieliemia morei teigeidieliemia puorei mo derei puo thuo uko ze sei tuo di uko kelalie; puo kekhrie mu puo nouzhie nu puoe uko rhalie, puo thiedzü nu uko piesieshü mu uko pfüüpie vor.

¹⁰ Derei ukoe keperhie di puo kemesa ruopfüu thepesuo; süla puoe uko ngumvü chüta, di puo thuo uko perhiepetsouta.

¹¹ Sitse ukoe thiedzü teisozhako, puo kituou Mosa teikiko rükralie. Dzükezhau nunu puo kuo kroko kepfheko ze parkelieu kirapuo ba ga? Puo kemesa ruopfüu pie uko nou keshüu,

¹² puo zayie bou bu Mosa dzie thezatsa vokeshüu, puo thuo puo za pie kechachie baketuo la, uko mhodzünu dzüko ketsieyakeshüu,

¹³ Kesouko donunu uko ze kepar-u kirapuo ba ga? Rayha nu kier puo tuoi, uko phi mesüta mo.

¹⁴ Periko razhau nu ketsu tuoi, Jihova ruopfüu kerülei pie uko tsü. Sidi no n za bu vithedze chüketuo la n themiako cha thashü.

Ngukemezhie mu Kekhruohi Kecha

¹⁵ Teigei nu pekhrotsa mehoshü phi, n ba kemesa mu zapuzayie kechüu nunu. N shürhei mu n kekuo kirapuo tuota ga? N nou kemehüu mu n nouzhieu kirapuo ba ga? Uko a kitsa vashü mote.

¹⁶ Noe hie puou zocü la, Abraham-e hie si mo zorei, mu Israel hie siücü puya mo zorei; he-i Jihova, no sü, hie puou; n za sü thiedzütho nu hie Rhakelieu zo.

¹⁷ He-i Jihova, kiüdi no hie bu cha vajowa ta? mu hie nou chü perepie hie bu n khrüprei mota ta? N kituoko la, n kayie seyieko la rürei la vorliecie.

¹⁸ N kemesa themiako dokipuo la mha peviese ba; derei tsie we hie ngumvüko n kemesachüu kedewate.

¹⁹ Hie puotei kecha no u mhodi mo zokecüko tuoite, n zau se kie kemo kro puo tuoite.