Isaya 62 - Angami Naga CL (Re-edited) Bible (BSI)

Zion Kelakeshü mu Mezhüu

¹ Zion la a kemekrietalie lho, mu Jerusalem la a rüleitalie lho, puo mezhüu teiso tuoi zie parlie kemochie, mu puo kelakelieu mitu puo tuoi tu parlie kemochie.

² Seyiekoe n mezhüu ngulietuo, mu kedi pete n kesokezie ngutuo; mu theza kesa puo pie n kietuo, Jihova tieu nu khashütuo.

³ Jihova dzie nu no kezivi tsüre puo chütuo, mu n Kepenuopfü dzie nu keditsüre puo chütuo.

⁴ No üse Vakewapfü ü salie lho, mu n kijü pie Raketau ü salie lho; derei no üse, A kenei Puo gei kebapfü ütuo, mu n kijü üse, Nyhüketapfü ütuo; Jihovae n ngu puo neiyacü la, mu n kijüu kiyalietuo.

⁵ Khriesamia puoe rüüpfü puo lieyakecü tuoi, n rüna chükeshüue n lietuo, mu yasaue yasapfü gei puo nei keba tuoi, n Kepenuopfüe n gei puo neituo.

⁶ Harie Jerusalem, a n dahou gei rükhoumia khapie bawate; khinhie rei theva rei ukoe mhakipuorei kemekrietalie lho. Nie Jihova rükrayakecüko rüleita hie,

⁷ mu puo bu rüleita hie, puoe Jerusalem chüpie kijü nu thetshe puo chülie kemochie.

⁸ Jihova puo zatsa mu puo bou kekuou pie rüsewate: Ae nieko lha khapie nie ngumvümia vachü lalie lhote, mu chazoumia bu n mhatho nu ngukelie khubedzüu krielie lho;

⁹ derei pfhü kengukecüko thuo cü di Jihova tshetuo, mu nie kengukecüko thuo a kemesa phetsuoko nunu krietuo.

¹⁰ Pralie, kharuko nu pralie, themiako la chau keselie; chülie, chaüu chülie, sünu ketsieko biewalie, themiako la zasi puo chüshülie.

¹¹ Jihovae kijü kela ketso ki pu pesishüwate: Zion nuopfü ki pushülie, “Harie, n kelakelie vorzhie; puo zhakhrako puo ze tuo, mu puo mhatho süu puo mhodzü tuo.”

¹² Uko üse, “Themia Kemesako ütuo, Jihovae Rhakelieko” ütuo; mu no üse, “Pfhükelieu, Vawa kemo Nadi puo ütuo.”