Isaya 61 - Angami Naga CL (Re-edited) Bible (BSI)

Kelakelie Kenei Die

¹ Niepuu Jihova ruopfüu a gei tuo, kekreilamonyü Jihovae a kenheliete; Puoe a bu dieliekevi se vo mia u peseketuoko ki punu, u melou pro tuoketako phashünu, u phreikeshü dieu pie kedieko pesinu, mu kedieko khashüwaketa die pushünu,

² Jihova ngukemezhie teicieu pu pesishünu, mu úko Kepenuopfü khepu zhau rei; kraketuoko nou thupeluoshünu;

³ Zion nu kra kebako la, mige sou nu nyiepoucü zu keliekecü, thekrü sou nu u kenei tier, kechaziekecü sou nu ketshe pfheü khashünu a ketseshü. Uko üse kemiatho phrieboko, Jihova zayie pesipengushüketuo la, puo thuo leikeshüko üdi kielietuo.

⁴ Ukoe thiedzü pekakewako chü la sielietuo, ukoe thiedzü vakewako piesie latuo; ukoe nadi pekakewako chü kemie latuo, phou kekra nu peka kevorko.

⁵ Sikemomia bu nie kuo kroko vachütuo, chazoumia thuo nie lie cie mu nie khubebo mezatuo;

⁶ derei nieko üse Jihova zievoko üdi kietuo, mia nieko üse Ukepenuopfü liethoko ütuo, nie-e seyieko kinyi cütuo, mu nie uko kinyi se mholietuo.

⁷ Kekreilamonyü nie ngau de keniete, mu nie zhasekecüe nie yau üdi pesi, süla nie kijü za kenie pie nie vie chütuo, kechachie u neikecü pie nie yachütuo.

⁸ A, Jihova kethoca a neiyacü la, A mha sekecü mu mhachü kekrükecü ngu mecü; a dietho di uko zhakhra khashü uko tsütuo, mu a uko ze kechachie dietseidiekho puo chütuo.

⁹ Seyieko donu uko nuosenuoyie situo, mu themiako donu uko cüünuoko situo; uko kengu pete rei Jihova japie uko ketsü themia ücü putuo.

¹⁰ Ae Jihova nu a nei phituo, a kelhou peteue a Kepenuopfü nu puo neituo; kekreilamonyü yasaue nyiepoucü zu kelieyakecü mhiei, mu yasapfüe puo nyie pie puo ketsoyakecü mhiei, puoe kelakelie pfhe pie a pedzieshüte, puoe kemiatho pfhe pie a whewate.

¹¹ Kijüu puo nhathe khashüyakecü tuoi, mu tezie puoe puo nu leikeshüu bu tsü paryakecü tuoi, Niepuu Jihovae kemiatho, mu ketshe bu seyie pete mhodzü lhou la partuocü la.