Isaya 60 - Angami Naga CL (Re-edited) Bible (BSI)

Zion Siedze Kevi

¹ Sielie, zielie; nie kezieu vorketa la, mu Jihova kesokezieu nie gei vorte.

² Kekreilamonyü kezeiue kijüu zepfülietuo, mu zeide-ikecü thuo themiako zelietuo; derei Jihovae nie gei sielietuo, mu puo kesokezieu nie geinu ngutuo.

³ Seyiekoe nie kezie nu vortuo, mu kediko nie kezie kemeva nu vortuo.

⁴ Tosie di lutsahatsa mehoshücie; uko pete kehou kenguliezhie, uko n ki vorzhie; n nuo thepfuko pecie nunu vortuo, mu thekepfüko u bou geinu n nuopfüko pie tuo.

⁵ Sitse noe ngu di n dzüziekruoitatuo; n melou veve di puo nei lhe motatuo, kekreilamonyü dzükezha kinyi ketshukelhuocü kru n vatuo, seyieko kinyi n ki vortuo.

⁶ Ut krodi puo thuo n whepielietuo, Midian mu Efa nu ut kemedzüko, Sheba nunu rei pete vortuo. Ukoe suna mu mha kethengu pie vortuo, sidi Jihova ketshe pu pesishütuo.

⁷ Kedar nu tekuokro pete vor n ki kengutuo, Nebaiot nu tekuochüko n lie chütuo; uko a ruosuoba gei lielie kevi chülietuo, mu a a zapuzayie kiu pie kezivishütuo.

⁸ Kimhou tuoi pruo ketuo mu paruonuoko tuoi uko kicieko nu kevo hako suomia ga?

⁹ Dzü khie kijüko a pfhetuo, Tarshish rouko bu kerie chütuo, kepecie nunu n nuonuoko, mu uko rakachü tsiu suna sa di uko ze vortuo, Jihova n Kepenuopfü za la, mu Israel Kemesau la, kekreilamonyü puoe n chü ketherhushüwate eru.

¹⁰ Sikemomia thuo n dahouko chüshütuo, mu uko kediko n lie chütuo; kekreilamonyü a a noupfhü nu n vüshü, derei a noushünouzhie nu n ngumezhie lashü.

¹¹ N kharuko khrü sei batuo; khinhie theva süko khalie lho; sitse seyieko uko kinyiko se n ki vortuo, uko kediko ze kesietha di vortuo.

¹² N lie chü kemo seyie mu kedirüvieu katatuo; seyie süko peka tseiwatuo.

¹³ Lebanon zapuzayieu, saipresbo, planbo mu tehouboko n ki vortuo, a kemesachü chü kezivishütuo üdi, mu a phizho chüu chüpie zayie chütuo.

¹⁴ N peseketuo nuosenuoyieko nuke rünuo n ki vortuo, tsiu n rütseyakecü pete n phi nu nuketsutuo; uko n üse Jihova Nadiu, Israel Kemesau Zion ütuo.

¹⁵ Mia n khawa mu n mecücü vo, tuo n rüna rei vathe mota zorei, ae n chüpie kechachie mesümedeshütuo, phou puo sie phou puo di u neiketuo chüshütuo.

¹⁶ No seyieko nudzü nutuo, no kediko nu nutuo; mu no ae Jihova n Kelakelieu, n Rhakelieu; Jakob Kekuou ücü silietuo.

¹⁷ Mese sou nu a suna se vortuo, mu thegi sou nu a rakachü se vortuo, sei sou nu, mese mu ketsie sou nu thegi, ae Kezekeviu bu n kemeho-u chü, mu Kemiatho bu n kepfhe kemeho-u chütuo.

¹⁸ N kijü nu zhosuo kechü si sa motatuo, mhavakecü morei bie pesuokecü n riehou nu si sa motatuo; no n dahouko üse Kelakelie, mu n kharuko üse Ketshe ütuo.

¹⁹ Khinhie gei niakiu bu n kezie chü salie lho, morei theva gei mha va peziekecü la khrüu bu keziepie n tsü motatuo; derei Jihova thuo kechachie n kezie chütatuo, mu n Kepenuopfü thuo n zapuzayieu chütuo.

²⁰ N niakiu le sa motatuo, morei n khrüu jü sa motatuo; Jihovae kechachie n kezie chütatuo eru, mu n kekra zhako tseitatuo.

²¹ N themia pete miatho phretatuo; uko kechachie kijüu pevielietuo. Ukoe a sekeshü nuotheko; a dzie pie chükeshüko, a bu zapuzayie chülieketuo la.

²² Ketsatho-u rei thinuo puo chütuo, mu kecütho-u rei seyie kekuo puo chütuo; ae Jihova zo; ae kenourhei di puo teiki süu chü tseishütuo.