Isaya 6 - Angami Naga CL (Re-edited) Bible (BSI)

Isaya Ziemho mu Puo Kekie

¹ Uzia kediu siaketa cie, a Niepuu kediba puo gei ba di ngu, rükrie mu zha; tsiu puo kewhepfheko rüsuokiu tshu.

² Puo mhogei serafko tha; puo puoshü sorourou; shü kenie pie puo zie ya, keniepie puo phi whe, mu kenie se pruo.

³ Siro puoe puo kie di sie: “Mesa, mesa, Krodiko Jihova mesa; kijüu pete puo kesokezie thuo tshu,” si.

⁴ Sitse kicie mvüdzeko meliekeshü pfhe si di rünieta, mu mikhu thuo kiu tshuta.

⁵ Sitse ae sie: “A sü hieshiehieruo! A sü jüte, a sü themia u tie mesa kemo puo, mu themia u tie mesa kemo kro puo donu bayacü la; sirei a mhi-e Kediu, krodiko Jihova nguwate!” si.

⁶ Sitse serafko puoe mibe pie ruosuoba geinu mizhü ketu puo bepie pruo a ki vor.

⁷ Sidi seraf-u süu se a me nyü di sie a ki; “Tsie hau n tie nyüwate, n kejo chüsete, mu n kephouma vashüwate,” sita.

⁸ Süsie a Niepuu pfhe hakemhie pucü si, “A bu supuo ketseshü ta, mu supuonie úko la vo ta?” si. Sitse ae sie, “A haki bawe, a ketseshücie!” sishü.

⁹ Sitse puoe sie, “Vo di themia hako ki pushücie: Rünyü we rünyü, derei lelie lho; meho we meho, derei silie lho.

¹⁰ Themia hako melou bie kerüvowalie, mu uko nyie bie kerüvüwalie, mu uko mhi bie peciewalie, uko bu uko mhipie ngulie kelho, mu uko nyie pie rünyülie kelho la, mu uko melou pie mha silie, mu rüreilie di uko chü keshürholie kelho la,” si.

¹¹ Sitse ae sie, “Kichiepuo ta, he-i Niepuu?” si. Sitse puoe sie; “Nadiko kaüjü vo themia lhou mota, mu kiko nu themia tuo mota, mu kijüu ruo tseita kemochie,

¹² mu Jihovae pete ketsepie kepetse nu shüwa, tsiu kijüu nu thechü vakewa kra phita kemochie.

¹³ Mhanuü sünu ker-zapuo baluo rei, terebintbo morei phriebo wikewa sie puomvü keba mhiei thewatuo!” Puo mvüu kemesa tsiau zo.