Isaya 58 - Angami Naga CL (Re-edited) Bible (BSI)

Puotou mu Puotou kemo Rüsuo

¹ Shiekhouilie, ketheta hie! Ketsü puo tuoi n pfhe piesielie! A themiako ki uko kejo pushülie, Jakob kinumia ki u kephoumako pushülie.

² Sirei uko khunhie puo sie khunhie idi a pfhü mu a zhoko silietuo ükecü u neiya, ukoe kemezhü chüyakecü seyie puo tuoi di uko Kepenuopfüe pethokeshüko khawa mo; ukoe a ki kemezhü capiko chaya, ukoe Ukepenuopfü penuo vorkecü u neiya.

³ “Hie bu mevo ba, derei no kiüdi süu ngu mo ga? Hie bu hie chü kerünuo se ba, derei no kiüdi süu silie mo ga?” Harie, nie mevo keba nhie zorei nie nei nie nyü pfhüta, mu nie lie kechüko pete pesetaya.

⁴ Harie, nieko mevokecü sü kegeikemeü mu zhosuo duthe pie kevüketuo la zo. Nieko thie kemhie di mevo keba ha nie pfhe kerükrie gei si kholie lho.

⁵ A haikecü kemevo kedalie me? Mia puo bu puo chü kerünuoketuo teisozha puo üme? Tekhrie tuoi puo rünge tsutuo me? Mu gakhropfhe mu mige nu zhütuo üdi me? Nieko hau üse mevokecü, Jihova bu teisozhau liekelie puo ütuo me?

⁶ A haikecü kemevo kedalie mo me: Kerüzhü phako phreiwaketuo, vocieu rhüko biewaketuo, mia u kepeseko bu rüütaketuo, mu vocie pete bietshewaketuo.

⁷ Nie khouka pie kemerümia ze keza, u ki kejü kejümiako ze n ki vortuoü, methuo ketuou ngushü tse, pfhe pie puo wheshütuoü; mu n thuo n siezedzürieko kinu n kevieta motuo ücüu mo me?

⁸ Sitse n kezie-e teikeso tuoi partuo, mu no shürho mhai partatuo; n kemezhüu thuo n mhodzü rietuo, Jihova zapuzayieu thuo n sietsa kepfhe chütuo.

⁹ Sitse noe kieshütuo, mu Jihovae khoshütuo; nie kekhruohi la melieshütuo, mu puoe sie, “A haki ba” ituo. Nie donunu vocieu, mia ketha dziekinuou mu mha kesuo pukecüu bie pejüwa ro,

¹⁰ nie nie kecükekrie pie kemerüko tsüshü, mu mia u pechükezhako se morokesuou pie u kelhuo chüshü ro, siro nie kezieu kezei nu siertuo, mu nie kezeiu khinhieluo tuoilietuo.

¹¹ Jihovae nie cha tha sei tuolietuo, mu thechü kesoko nu nie se morokesuou pie nie kelhuo chüshütuo; tsiu nie ruko chü kemeteishütuo; siro nie bu dzü kevi tezie puo tuoilietuo, mu dzü jütaya kemo dzüluo puo tuoilietuo.

¹² Nie rüna kewe suoketako chü lalietuo; nie phou kekra mvüdzeko chü lashütuo; no üse suoketara chü lakeshüu, mia bu baketuo la chako chü lakeshüu situo.

¹³ Mhanuü noe sabat kedewa molie ro, a teisozha kemesa nhie n nei n nyü chüta molie ro; sabat pie n kenei zha puoü kielie, mu Jihova teisozha pie ketherhulie ro; no süu rhu, di n thuo n cha nu vota molie, n nei n nyü chü, morei n thuo n mhathoko whuota molie ro;

¹⁴ Noe Jihova nu n neilietuo, mu a n bu kijü kerükrieko gei balietuo; a n puou Jakob kayie pie n vachütuo, Jihova tie nunu pushüwatakecü la.