Isaya 56 - Angami Naga CL (Re-edited) Bible (BSI)

Dieze Chükelie Pete la Dietseidiekho-u Khakeshü

¹ Jihovae puya: Kethoca se balie, mu mezhü ücüu chülie, pecha mo di a kelakelie vortuo, mu a shüphrakelie pengushütuocü la.

² Hau chüüzekezhamia, hau theze tsapie bakelieu, sabat se bakelieu, mu süu perhu kemo-u, mu mha kesuo kechü nunu puo kethekelieu thejakepfütho zo.

³ Jihova chüüvaketa rüso-u bu hakemhie pu hie, “Jihovae puo themiako kinu a kelhi touwa,” si hie, mu iunuk-u bu rei, “A sü seisia ze,” ita hie.

⁴ Jihovae puya: A sabatko pie bayakezha iunukmia, a nei a medo-u kedayakecümia mu a dietseidiekho-u setsakebamia ki,

⁵ A a ki nu mu a cahouko nu u nuonuo thepfuko tsiu thenuko ki vikuokecü, rükraketuo vie puo mu theza kevi puo pie tsütuo; ae dathewa kelho kechachie za puo pie uko tsütuo.

⁶ Siro chazoumia u thuo Jihova lie chü mu puo zau khrie, siro puo kituo chü, sabat se keba pete mu süu perhu mo, tsiu a dietseidiekho-u setsatuo üdi Jihova chüüvaketa khe.

⁷ A hako ze di a kemesa kijüthou gei votuo, sidi a kechaki nu uko bu uko neituo; uko kethe ruosuoko mu uko ruothoko a ruosuobau geinu lielietuo; kekreilamonyü themia pete la, a kiu pie kechaki üdi kietuo.

⁸ Israel whuowaketako pfhü kenguyakecü, Niepuu Jihovae puya, a tsie kengulieketako zo moü kekreimia rei ze vor uko ki shütuo.

Israel Kekhakezhako Kekrükecü

⁹ Nie nhachü pete, nie ketsa nu ketuo nhachü pete, mezulieketuo la vorlie!

¹⁰ Israel kepfheko u mhicie, uko pete u kesikele jü; uko reya kemo tefü keliehuo, süla relie si mo; u mho pema, zhü rühi, zekezhü u nei.

¹¹ Tefüko u me vi kemerie; ukoe kepevü siya mo. Kuopfheko puocapuola sikelie rei jü; uko pete cha u tse vate, uko thuo u zhazhü le phre, mia peteko.

¹² Ukoe hai baya; “Vorlie, khubezu pfhülie khe; úko zu kekuo pie u tshulie khe. Sodu rei thie mhietuo, zhapie mejükeliepfü mo,” iya.