Isaya 55 - Angami Naga CL (Re-edited) Bible (BSI)

Ukepenuopfü Ngukemezhie Khakeshü

¹ Harie, kehoupuorei keterhüu, dzü nu vorliecie; mu raka kejüu, vorlie, khrüpie cülie! Vorlie, raka se mo mu puoma sa mo di khubedzü mu mithunudzü krieliecie.

² Kiüdi nie niekhrüda kemo puo la nie raka keza, mu u kelhuo chülie kelho puo la mhachü kemezhieya ga? A die rünyü menuolie, mu mha keviu cülie, tsiu kecüca keviko nie neilie.

³ Nie nyie kedeishülie di a ki vorlie; rünyülie, siro nie rheilietuo. A n ze kechachie dietseidiekho puo chütuo, a rüdi kemo, kekhrie ketho, se David kekhrieu.

⁴ Harie, a themiako la puo pie zhapu puo chüshü, themiako la puo pie krüta puo mu kezha puo chüshü.

⁵ Harie, noe si kemo seyie kro puo kietuo, mu seyie n siya kemo kro puo n ki vortuo, kekreilamonyü Jihova n Kepenuopfü Israel Kemesau, puoe n chü pezhashüte.

⁶ Jihova pfhüliecie puo ngulie kevi ki, puo kieliecie puo penuo keba ki,

⁷ kerüzhüu bu puo zho vawalie, mu miathokemo-u bu puo nouleko vawalie; uko bu Jihova ki vorlie, puo bu uko ngumezhielieketuo la, puo bu Ukepenuopfü ki la vorlie, puoe vapie tsü phishüketuo la.

⁸ A nouleko sü nie nouleko mo, morei a zhoko rei nie zhoko mocü la, Jihovae siya.

⁹ Teikoe kijüu ki rükriekecü tuoi, a zhoko rei nie zhoko ki rükrie, mu a nouleko rei nie nouleko ki rükrie.

¹⁰ Teirü mu pekrie teigei nu tsuryacü la, mu uko kijü tsheshü kemochie la sünu khoya mo, mha pethepelhoushü di tsia vüpie tsievau tsü mu cava pie kechüu tsüyacü tuoi.

¹¹ Süla a tie nunu kepra a dieu rei situo; methuo di a ki la vorlie lho, derei a rakeshüu chü tseishütuo, mu a puo bu chünu di puo ketsekeshüu nu vilietuo.

¹² Nie nei di pratuocü la, mu noune nu nie ze la vortuo; kijüthouko mu kijükhruko nie mhodzünu tsali chü partuo, mu terha seibo pete dziedatatuo.

¹³ Zohu sou nu saipres partuo; huphienuo sou nu mürtel partuo; mu süu Jihova la kerükra puo chütuo, dathewa kelho kechachie zasi puo chüketuo la.