Isaya 53 - Angami Naga CL (Re-edited) Bible (BSI)

¹ Supuonie hie kesikenguko pelelie ga? Siro Jihova boue supuo pengushü ga?

² Puoe puo mhodzünu nhanuo yopuo tuoi lhou sier, mu kijü keso nu nhamie puo tuoi par; puorhi morei puowe nyi di u bu ngu vikecü puo gei tuo mo, siro puo kenguu nu puo mehoulieketuo jü.

³ Mia puo mecü mu puo melie; kemezhiekecümia puo chü mu kelhokemezie si; mu mia puo ngu ro u zie kevietayakecü puo tuoi mia puo pie kethese, siro we zorei puo le ketherhu mo.

⁴ Ketho zo, puoe u mezhieko lhoupfülieta zo, mu u kechükenyüko pfüliete; sizorei we puoü kere dzükelie, Ukepenuopfü thuo puo vüshü tsiu puo pechüpenyükewa puo tuoi di le.

⁵ Derei u kejokemouko la puo bie kerüza, u kerüzhüko la puo vümvü, kepechü pie puo gei keshü la u bu shürholie, mu puo kevüpfüko la u chü kemenelie.

⁶ U pete tekuo tuoi yotuote, u pete cha u tse va phrete, mu u kesuoko pete Jihovae pie puo gei shüshüte.

⁷ Puo pesüpemvü, mu puo pechüpenyü, sirei puo tiega rei mo; tekuonuo ze kedukhri nu kevo tuoi, mu tekuoe puo mie kebeko mhodzü meümo ketha tuoi, puo tiega rei mo zo.

⁸ Kethocau bie kethotsüwa di puo zeta. Supuonie puo gei kiütatuo shicü lelie vi ta? Kekreilamonyü kerheiko kijüu nunu puo dawa, mu a themiako kejo la puo vüwate.

⁹ Ukoe puo kekhru chü pie kerüzhüko ze kerhe mu kenyiko ze puo mekhru chü, puoe zhosuo tho puorei chü mo zorei, tsiu puo tie nu mia kese tuo mo zorei.

¹⁰ Sizorei puo pechü di vümvüketuoe Jihova medota. No puo kerheiro pie kephouma la khakeshü ki, puoe puo nuosenuoyie ngutuo, sidi puo teisozha chü pechashütuo; puo geinu Jihova medo-u kruolietuo.

¹¹ Kemezhiekeshü geinu puo kezieu ngutuo; puo kesikele geinu puo kenei ngulietuo. Kemiatho-u, a kituou, kemiathomia kekra chüshütuo, mu puoe uko kejokemouko pfülietuo.

¹² Süla ae puo pie kezhamia mhaza nu shütuo, mu puoe kekuomia ze mha vakelieko kezatuo; kekreilamonyü puoe puo khapie kesia nu shüshü, mu kejokemouko sa puo phrülie; sirei puo mia kekra kephouma pfülie, mu kejokemouko la die pu.