Isaya 52 - Angami Naga CL (Re-edited) Bible (BSI)

Zion Bu Puo Neiliecie

¹ Colie, colie, n kekuou selie, he-i Zion! N pfhenei keziviko selie; he-i Jerusalem, kemesa nadiu; zhürekemoko mu mesa kemoko n ki vor salie lhotacü la.

² Nyophe n kevako kesouwalie, sielie, he-i Jerusalem, kedieu; n vo kepha roko phreiwalie, he-i Zion nuo kediepfü!

³ Jihovae puya: Puoma jü di nie zewa, mu raka sa mo di nie rha lalietuo.

⁴ Niepuu Jihovae pucü: Thiedzütho a themiako chazoumia chü di Ijipt nu lhoutuoü tsu; Asiria rei kemethuo nu uko peseta.

⁵ Süla Jihovae puya, a tsie kedipuo chü ba di kemethuo nu mia bu a themiako tezeta ga? Uko kezhako kra baya mu zhate a zapie kethese baya. Jihovae siya.

⁶ Süla a themiako bu a za situo, süla sünhie die pukeshüu A zocü uko bu situo; A haki ba zo.

⁷ Kezekevi pu pesikeshü dielieko phi kijüthouko gei ketuo kide zivi shi! Dieliekevi se kevor-u, kelakelie pu pesikeshüu, Zion ki, “N Kepenuopfü di ba” ikeshüu.

⁸ Rünyülie! N rükhouko u pfhe chüzhie, uko keze u nei di kelizhie; ukoe Jihova Zion nu la vorketa keze mhotsou ngu batacü la.

⁹ Nie Jerusalem nu thechü raketako, keze tsali chü sierliecie; Jihova puo themiako thupeluoyacü la, puoe Jerusalem rhaliete.

¹⁰ Jihova seyieko pete mhingu chü puo bou kemesau hieshüte, mu kijü vala pete bu Ukepenuopfü kelakelie ngutuo.

¹¹ Tuotalie, tuotalie, cü nunu pratalie! mha mesa kemo puo rei bie hie; süko donunu pratalie, nie thuo nie chü kemesalie, nie Jihova khouühie pieyakecüko.

¹² Nie bu rükri zo di pratuoü ba mo, mu nie theta chü di pratieya mocü la; Jihovae nie mhodzü tuotuo, mu Israelko Kepenuopfüe nie sietsa kepfheu chütuo.

Kemezhiekecü Kituou

¹³ Harie, a kituou we vikehielietuo, puo chü ketherhu mu pesieshütuo, mu pie kerükrie seshütuo.

¹⁴ Mia kekra puo ngu u ngokecü tuoi, puorhi kreipie themia mhie mota zo, mu puorhi themia rhi mota zo.

¹⁵ Siro puoe seyie kekra kedeshütuo, kediko puo ngu di tiematatuo; ukoe uko ki pushü kemoko ngutuocü la, mu ukoe thiedzü pemhopemhi kemoko lelietuo.