Isaya 50 - Angami Naga CL (Re-edited) Bible (BSI)

¹ Jihovae puya: N zuo vakewa leshüu, puo vakewa leshüu kirapuo ba ga? Morei a supuo pu pfüzhü di süu ki n zewa ga? Mo, n kerüzhüko la n zekewa zo, mu n kejo la n zuo vakewa zo.

² Kiüdi a kevor ki miapuorei ba mo ga? Kiüdi a kiekeshü ki miapuorei pfhekho mo ga? A dzie dzüta di süu rhalie kenjüte me? Morei shüphralieketuo a kekuo jü üte me? A pfhükeshü geinu a dzükezha chü pesowa, a kerüko chüpie kijükesia chüwa; uko khuoko dzü kejü la mena, mu terhü di siata.

³ A ketei pie teiko pedzieshüya, mu gakhropfhe pie uko kewhe chüshüya.

Ukepenuopfü Kituou Dieze Kechü

⁴ Dieca puo pie mezieketau va perheikelie do silieketuo la, Niepuu Jihovae kepethamia meü pie a tsüshü. Teisoduü puoe a kesou, a nyie va perho di a bu pethalieketamia tuoi rünyülieketuo la.

⁵ Niepuu Jihovae a nyie bu cie parte, mu a dieze chü mota mo, a rürei pesieta mo.

⁶ Ae rünoupie a kevüko tsü, mu a dzo pie a tiemie kepieko tsü, thenga mu mhitsiepie vakecü nunu a zie kevieta mo.

⁷ Niepuu Jihovae a khruohiya; süla a ziekejü chüta mo, süla a a zie pie tsiekhrü puo tuoiliete, mu a thenga chütalie kelho si ba;

⁸ a yapiekecüu penuote. Supuo a ze keperhie ta? Úko keze thalie khe. A ngumvümia suomia ga? Uko bu a ze kesecie.

⁹ Niepuu Jihova sü a kekhruohiu; supuonie a jo üdi pulie ta? Uko pete pfhe puo tuoi suotatuo, shülhe thuo uko cüwatuo.

¹⁰ Nie donu supuonie Jihova prei mu puo kituou die ze, kezei nu tuo, mu kezie jü, derei Jihova zau pele mu puo Kepenuopfü khremerüyakecü ba ga?

¹¹ Derei nie mi petushüyakecü pete, mituu petushüyakecü pete. Nie nie mi kezieu nu tuoliecie, mu nie nie mituko nu tuoliecie! Nie-e a dzie nunu hau ngulietuo: nie nousuo nu zhütuo.