Isaya 5 - Angami Naga CL (Re-edited) Bible (BSI)

Khubesi Vülieya Kemo Lieu Dze Tsali

¹ A bu a neiu la puo khubelie dze kekhrie tsali puo chüshüthie: A neiu sü kijü kro sekecü kijüthou puo gei khubelie puo ba.

² Puoe süu phieshülie di ketsieko pawa, sidi khube kevitho leishü; puoe süu metsuo nu rükhouba puo chüshü, mu sünu khube zutse puo hoshü; puoe sünu khubesi vükeshü merü ba, derei süu nha khubesi vüta.

³ Süla tsie, Jerusalem nu kelhouko mu Juda themiako, a mu a khubelie hienie donu theca chüshücie.

⁴ A khubelieu la a chü tso kemo mha kicüpuo chü sashü zhü ga? A puo bu khubesi vükeshü merü keba ki, puo kiüdi nha khubesi vüshü ga?

⁵ Mu a tsie a khubelieu gei chüshüketuou pushütuo. A puo cakhako biewatuo, sidi süu pejüwatuo; puo dahou biemewatuo, sidi süu kedewatuo.

⁶ A puo pekapemhewatuo; puocoko be motatuo, morei kejü pie chü sa motatuo, sidi huphienuo mu zohuko lhou sietuo; A kimhouko ki diekhashü di uko bu teirüpie puo va motatuo.

⁷ Krodiko Jihova khubelieu sü Israel kikruko zokecü la, mu Judamia sü puo kenei mhalei zo, puoe kethocau merü, derei thezie kepekru ngulie; kemiatho merü sie, derei kekra pfhe silie!

Mia Gei Dietho Kemo Kemichie

⁸ He-i, nieko ki chüpie ki sa, lie pie lie sasa vo, nie rübei sie kekreimia la thechü ba moketa ketso, mu n rübei di kijü metsuo nu baketuou!

⁹ Krodiko Jihovae a kesi kinu rüseshü: Ki kekra kira chüta zotuo, ki zha mu zivikecüko, themia puo nu lhou motatuo.

¹⁰ Khubelietsa ker pie puo rübei vütuo, mu tsia chü puo cieshü ro khodei puo rübei vütuo.

¹¹ Ce, zu kekuo krie kenyü la khise sie ziyakecüko, thevatie ketso zu bu u the bayakecüko,

¹² Thehethehieko nu nyarübou mu harp, kekreikecüko siro luoü mu zu seya, derei ukoe Jihova mhathoko ü mha üya mo, morei puo dzie mhatho mehoya mo!

¹³ Süla a themiako kesikele jü di miadie chü tuote; uko donu therhuko khesiazhie, mu uko miakrau terhü tuote.

¹⁴ Süla Sheol bu puome mehuo, mu puotie bu meyathorliete; di Jerusalem pehüko mu krodiko, puo krodi tsiu puo gei u nei keba pete keze sünu lete.

¹⁵ Themia bu nuketsute, themia pete bie kerünuowate, mu kerüzhakecüko mhi bu tosielie mote.

¹⁶ Derei Krodiko Jihovae kethocau geinu rükrieliete, mu Ukepenuopfü Kemesau kemiatho nu puo thuo mesapie mia kietuo.

¹⁷ Sitse tekuokoe u zho nu tuoi di nha cütuo, mu tekuonuo kecüko phe raketako nu mha pfhü cütuo.

¹⁸ Ce, kecürü ro pie kejo teshüyakecüko, bagei ro mhie di kephouma teshüyakecüko

¹⁹ Ukoe sie, “Puo bu rükrilie, puo bu puo mhatho chü pezilie di u bu mehoshüthie; Israel Kemesau mharhüu bu chü tsei rükrishü di u bu süu sishüthie!” siya.

²⁰ Ce, nie kesuo üse viü mu kevi ü suo üyakecüko, kezeiu pie kezie ü mu kezieu pie kezei ü, kepfhü ü kemou ü mu kemou ü kepfhü üyakezhako!

²¹ Ce, nie nie thuo nie mhiki mhasi üyakezhako, mu nie thuo nie mhinguki mecie üyakezhako!

²² Ce, zu kekrie nu kethepfumia kechüko, zu kekuo pie kereikecü nu miavimia chüyakecüko,

²³ theso la kejomia üse mezhü üyakezhako, mu kemezhümia mezhüu pejüwayakezhako!

²⁴ Süla meü mi-e rügu the pejüwayakezha mhiei, mu nha kesiako miü nu jütayakezha tuoi, uko mie zorei cietatuo, mu uko pouko zorei nyophe mhietatuo; ukoe krodiko Jihova zho-u khawa, mu Israel Kemesau die rütseketa la.

²⁵ Süla Jihova nouyie puo themiako gei tu sieta, sidi puo dzie yhase uko perhie mu uko vüshü; kijüthouko rünieta, mu uko kesiamiako chadi nu nyorhu mhie zhüta. Hi zo shierei puo nouyie rüdita mo mu tsie rei puo dzie yhapie ba zo.

²⁶ Puoe ratsa keba seyie puo ki zasi piesieshütuo, mu kijü kela nunu mesupie süu kieshütuo. Sitse harie, süko mhai mu rhüi vorlie!

²⁷ Miapuorei mezieta mo, miapuorei puo phi mesü mo, miapuorei rüngu morei zeta mo, chiepha puorei rünyhuta mo, phikou phako puorei teta mo;

²⁸ uko theütsieko methe, u theüko ga phre pie, u kier mouko ketsiethega tuoi, mu uko bageithuoko khriewhi mhie,

²⁹ uko mehokeshü losha kemhie, losha nuonuo tuoi uko meho; uko nge di u chüte te, uko süu pietata, mu miapuorei süu kela lalie kenjüta.

³⁰ Sünhie ukoe süu gei meho batuo, dzükezha puo pfhe kechü mhiei. Mu mhanuü mia puoe kijü mehoshü ro, kezei mu kemezhiekecü rübei; mu kimhouko la kezieu va pezeikewa ngutuo.