Isaya 49 - Angami Naga CL (Re-edited) Bible (BSI)

Jihova Kituou Seyieko la Kezie Puo Chütuo

¹ A pfhe rünyüliecie, he-i, dzü khie kijüko, rünyüliecie, nie kepetse nu themiako! Jihovae a penuolie kemonu a kielie, a zuo va nu ketuo nu puo a za thoshü.

² Puoe a tie chüpie zhiecha puoü kevi puo mhieishü; puo dzieu khrükhro nu puo a kevielie; puoe a pie vaikecü theütsie chüshü, puoe a pie puo theütsiebou nu keviewa.

³ Sidi puoe a ki, “No a kituou, Israel, n geinu a chü pezhashüketuou zo,” si.

⁴ Derei a sie, “A kemethuo mezhie chü, a kemethuokemeruo nu a kekuo pevowate; sirei a nyieu sü Jihova gei ba, mu a zhakhra sü Ukepenuopfü ki ba zo,” si.

⁵ Siro tsie Jihovae puya, Jakob ze puo ki la vortuoü mu Israel kengupie puo ki shülietuo üdi, nuobvü nunu puo kituou chütuo üdi a chükelieu, Jihova mhinguki a pie ketherhushüta zocü la, mu a Kepenuopfü a kekuou chüte.

⁶ Puoe pucü, “Jakob seyieko piesie laketuo mu Israel lhiekelieko ze lalieketuo la, n bu a kituou chükecü mha kecü puo zo; a kelakelie bu kijü vala tsolieketuo la, ae n pie seyieko kezie puo chütuo.”

⁷ Jihova, Israel Rhakelieu mu puo Kemesau, seyieko puo kemecüu, puo rütse phikecüu, mha kekhakezhako thekeu ki puya; “Jihova, kedietho-u, Israel Kemesau, nie kedakelieu la, kedikoe ngu di siethalietuo, kedinuoko rei u thuo rünuotsu n kelutuo.”

Zion Nuonuoko Ze La Vorshüketuo

⁸ Jihovae puya: Puotei kevi puo nu a n die kelashü, kelakelie teisozha nhie a n khruohishü; kijüu bu balieketuo, mu raketa thekau kezashüketuo la, a n se balie mu n bu kepfhekhokecü puo chüpie themiako ki shü.

⁹ Sidi kedieko ki, “Parlie!” ishü, kezei nu kebako ki, “Par mia mhingu chüshülie,” ishü. Ukoe cha nu mhacütuo, methuokecü kijü kerükrieko nu uko nha pfhü cütuo;

¹⁰ Ukoe terhümerülie lho, teikhrie kele morei niaki uko bie pesuowalie lho, uko ngumezhiekeshüu thuo uko cha thataketuo la, mu puoe dzüluo kenyira uko ze votuo.

¹¹ Siro a kijüthou pete pie cha chüwatuo, mu a chaüko chü kerükriewatuo.

¹² Legei, hako kepecie nunu vortuo, mu legei, hako pesotsa mu niakratsa nu, tsiu hako Sinim kijü nunu.

¹³ Kenei la kelilie, he-i teiko, mu nie neilie, he-i kijüu; tsali chü sede parliecie, he-i kijüthouko! Jihova thuo puo themiako nou thupeluoshüte, mu puo themia kemezhiekecüko ngumezhie zotuo eru.

¹⁴ Derei Zion-e “Jihovae a khawate, a Jihovae a rükra mote,” iba.

¹⁵ Thenumiae puo nuo kenuyo rükra mo, morei puo noupranuoyo ngumezhie motalie vi me? Uko zowe rükra motalie vi, derei a we n rükra motalie lho zo.

¹⁶ Harie, a n rhipie a dziezhü nu shüliete; n dahouko a mhodzüki ba seiya.

¹⁷ Nie ki kechükoe nie kepekako ki zivikuo, mu n pekakewako n kinu tuo pratazhie,

¹⁸ Tosie lutsahatsa mehoshücie; uko pete kengulie, uko n ki vorzhie. Jihovae pucü, a rhei ketuo tuoi, no uko pie rütsonyie kemhiei di setuo, yasapfü tuoi no uko pie n gei shütuo.

¹⁹ N phe kaketa mu raketako tsiu n kijü vakewako, tsie we n themiako la merethorta toutuo, mu n mezukelieko pecietatuo,

²⁰ thenou kesuo teiki nu n nuo penuokelieko n kesi kinu, “Thechü a la merethorte; a bu balieketuo la thechü khashücie,” situo.

²¹ Sitse no n nou nu, “Supuonie hako penuoshü a tsü ga? A nuonuo siata mu nuojü chü, a whuowa mu a vawa, ru supuonie hako theke siershü ga? A rübei zota, ru hako kirapuo nu vor ga?” si ba.

²² Niepuu Jihovae puya: A a dzie yhapie seyieko gei shü mhaishütuo, mu themiako ki a zasiu piesieshütuo; mu ukoe uko merü geinu n nuo thepfuko pie vortuo, tsiu n nuo thenuko uko bouka geinu pie vortuo.

²³ Kedimia bu n thekekelie puonuoko chütuo, mu kedipfüko bu n thekekeshü zuopfüko chütuo, uko zie zerepfü di nuketsu n kelutuo, mu n phizhü gei nyophe meyotuo. Sitse no ae Jihova zo ücü silietuo; a khremerüyakecüko bu thenga chülie lho.

²⁴ Kekuomia dzie nunu puo chüteu sesetalie vi me? morei u zho kesuomia dzie nunu kedieko kelalie vi me?

²⁵ Derei Jihovae puya: Kekuou diemiako rei kela lalietuo, mu puo zho kesuou dzie nunu telieketau kelalietuo; a thuo n perhiekecüko perhietuo, mu a n nuonuoko kelalieketuo la.

²⁶ A n neketekecüko bu u thuo u chü cütuo, mu zu kekrie tuoi u thuo u zie krie mezetuo. Sitse chüüphou pete ae Jihova n Kelakelieu, mu n Rhakelieu, Jakob Kekuou ücü silietuo.