Isaya 48 - Angami Naga CL (Re-edited) Bible (BSI)

Kepenuopfüe Chükeshüu mu Rhakelieu

¹ Hau rünyüshücie, he-i Jakob kinuko, Israel za se u kieyakecüko, Juda va nunu keparko; ketho mu kemezhü nu mo di Jihova za se rüse, tsiu Israel Kepenuopfü kieyakecüko.

² Nadi kemesau za se uko thuo uko kieya, tsiu uko thuo Israel Kepenuopfü gei bayacü la; puo zae krodiko Jihova we.

³ Mha kerieko a thiedzütho nu pushüte, uko a tie nunu par mu a thuo süko pu pesishü, sitse a vapuonu süko chüshü ru uko parlie.

⁴ Kekreilamonyü ae no kenyietokecü si, mu n vo nyhie thegi se chü tsiu n teikhie mese se kechü si.

⁵ A thiedzütho nu süko se n ki pushü, mha süko vorketuo a se n ki pushü, n bu, “A rhuorhi thuo chüshü, kepie kechü, mu lhokelie terhuorhiko thuo diekhashü” sitalie kelho la.

⁶ No sishüte, tsie hako pete ngushüe; sidi no pushü lho me? Tsie yawinu a nie bu mha kesa rünyütuo, no si moluokecü keviepie ketuoko.

⁷ Tsie we uko chüürhiliete, pecha moluo; thie mhodzü no uko dze si mo zoluo, n bu “A süko site,” idi putalie kelho la.

⁸ No mhakipuorei sishü mo, no mhakipuorei si tuo mo, thiedzütho nu n nyieki cie par mo zo. No sü cürü se di mhachü meciekecü, mu n penuoshü tsenu no üse mia kepetsouu ükecü a sikecü la.

⁹ A zau la a nouyieu shükhre, a thetsheu la n gei a kethe, a n dathewa molieketuo la.

¹⁰ Harie, a n chü kemesawate, derei rakachü kemhie di mo, a kemezhiekecü miu nunu n the mehowate,

¹¹ A thuo a zau la, a thuo a zau la, a süu chüshü, kekreilamonyü kiüdi a zau bie perhuwatuo mu? A zapuzayieu pie kekreimia tsülie lho.

¹² A die rünyüliecie, he-i Jakob, mu Israel, A puo kiekelieu, ae Puowe, Ae therieu mu Ae thelau,

¹³ A dzie thuo kijüu mvü dzeshü, mu a dzie a zatsa pie teiko kelhashü; a uko kiekeshü ki, ukoe a mhodzü tsesei-i thataya.

¹⁴ Nieko pete, kengulie, di rünyülie! Uko donu supuonie hako pushü ga? Jihovae puo khrieya; puoe Babilon gei puo keleu chüshütuo, mu puo boue Chaldiako petsoutuo.

¹⁵ A, a thuo, pushü mu puo kie, a puo ze vor, mu puoe puo cha nu vikehielietuo.

¹⁶ A penuo vorlie, hau rünyülie! Therie nu zorei a pekhre di die pu mo, tse nu a tuote. Siro tsie Niepuu Jihovae, a mu puo ruopfü ketseshüte.

¹⁷ Jihova, nie Rhakelieu, Israel Kemesaue puya: Ae Jihova nie Kepenuopfü, nie dzevi la nie pethayakezhau, nie vokezhü nu nie cha thashüyakecüu.

¹⁸ He-i, nieko a diekhakeshüko rünyülie ücü we! Sitse nie kruokelie-e kerü puo tuoilietuo, mu nie vikelie-e dzükezha rüpfhü tuoilietuo;

¹⁹ nie tsu nie züe huocanyoko tuoilietuo muru, mu nie nuosenuoyie-e huocanyo tuoilietuomu ru! mhakipuorei a mhodzünu uko za dathe morei pekawalie lhomu ru!

²⁰ Babilon nunu pratacie, Chaldia nunu tatacie, keneipfü shie di hau pushülie; hau keyiepie kijü kela nu shülie; di, “Jihovae puo kituou Jakob rhaliete!” silie.

²¹ Puoe uko ze kijükesiako cie kevo ki uko terhüta mo; puo uko la ketsie geinu dzü bu kru par; puo ketsieu biekhoshü ru dzü rüluo par.

²² Jihovae puya, “Kerüzhüko la we, noune jü.”