Isaya 46 - Angami Naga CL (Re-edited) Bible (BSI)

¹ Bel-e nuketsu, Neboe nerhutsu di uko terhuorhiko sü khunuo mu periko gei shü; nie pfüketuo mha hako khunuo pie chü u pelho ketuo zo.

² Uko keze nuketsu, keze nerhutsu; uko thepieu kelalie kenjü di keze miadie kechü nu vota.

³ A die rünyüliecie, he-i Jakob kinuko, Israel kinumia lhie se keba pete, nie penuoshü tse nunu a bu nie toupie, nuobvü nunu nie pfü vor;

⁴ nie tsa nie chie ketso rei a sü Puo zo, nie tsü rüpouketa ketso rei a nie pie tuo; ae chüshü, mu a thuo pfütuo; a toupie tuo mu a kelashütuo.

⁵ Nie supuo pie a mhieü, mu a ze ketouü, tsiu a ze kemejü di hienie rhi kemhieü ta?

⁶ Likhuo nunu suna kha seshü, mu rakachü pie roshükhou nunu mejükeshüko, uko suna rükreimia puo zhakhrülie, puoe terhuo puo chüshü, sidi ukoe tsu süu rüsuoya.

⁷ Uko u bouka geinu süu toupie, ukoe puo pie puotha nu shü, sitse süu sünu thata; süu puo tha nunu melelie lho. Mia puoe puo kieshü rei puoe khoüya mo, morei kemezhiekecü nunu miapuorei kelalieya mo.

⁸ Hau rükrashüi, mu leshücie, süu pie nie nou ki la vorlie, nie vajokewako.

⁹ Kerieko vieko rükrashücie; ae Kepenuopfü zo mu kekreimia puorei jücü la; ae Kepenuopfü, mu miapuorei a kemhie jü,

¹⁰ Sietsenu thelau dze pushü, mu kerieki nu mha vor moluokecüko dze pu di, “A mharhüu tha zotuo, mu a rhükelieu chüshü zotuo,” ikeshüu.

¹¹ Niathutsa nu mha tekecü pera puo kieshü, rüna kepetse puo nunu a mharhüu la kevor themiau. A pushüwate, mu a süu chüshütuo; a raliete, mu a süu chü zotuo.

¹² A die rünyüliecie, nie nou kekhrüko, nie shüphralieketuo nunu pecie tuoketako;

¹³ A shüphrakelieu se penuo vor, süu pecie tuo mo, mu a kelakelie telhe lhote; a kelakelie pie Zion nu shütuo, a zapuzayieu Israel la.