Isaya 45 - Angami Naga CL (Re-edited) Bible (BSI)

Mhatho pie Sairos Pelekeshü

¹ Jihovae puo thuo kenhekelieu, Sairos ki pucü, a thuo puo dzie puo zatsa thezepielie di puo mhodzünu seyieko bie kerünuowa, mu kediko pfhenei rhuoshü, puo mhodzünu kikhako khrüshütuo, mu kharuko khawalie lho.

² A n mhodzünu votuo, di kijüthouko keva kemethawatuo, a mese kikhako bietshe babawatuo, mu thegi kharuko dawatuo.

³ Ae kezei kinyiko pie n tsütuo, mu kepekhre kinyi keviepie kebako, sidi noe a Jihova Israel Kepenuopfü, n za se n kiekeshüu ücü silietuo.

⁴ A kituou Jakob, mu a thuo kedakelieu Israel la, a n za se di n kie, no a si morei a n za thoshü.

⁵ Ae Jihova zo, mu kekrei ba mo, a sie terhuo kekrei jü. No a si morei, a n rünyie keseshü.

⁶ Mia bu niaki kethutsa nu, tsiu niakratsa nu, a sie kekrei ba mo ücü silieketuo la; Ae Jihova zo, mu kekrei ba mo.

⁷ A kezieu chüshü mu kezeiu chüshüya, a hievi chüshü mu hieshie chüshüya; a Jihova, mha hako pete chükeshüu.

⁸ He-i teiko, peso geinu rüshücie, tsiu teiko bu kemiatho rüshücie; kijü bu rükoshü, di kelakelie bu thusierliecie, mu süu bu kemiatho piesierliecie; A Jihovae süu chüshüwate.

⁹ Puo chükeshüu ze keperhie kebau we ce, chülietie, rünyolikoe litho-u ze keperhie kebau ce, chülietie! Linyo-ue puo rhikebau ki, “No kedipuo chü ba ga?” morei “No chükeshüu puokhei jü” iya me?

¹⁰ Kehoupuorei puo puo ki, “No kedipuo penuoshü ga?” morei thenumiapfü puo ki, “No kedipuo nuonuovachü chü ba ga?” ikecümia we ce, chülietie!

¹¹ Jihova, Israel Kemesau, mu puo chükeshüue puya: No a nuonuoko dze a ketsotuo me? morei a dzie mhathoko la a ketsetuo me?

¹² A kijüu chüshü, mu themia chüpie puo gei shü; a dzie thuo teiko ciethashü; mu a uko kro pete ki diekhashü.

¹³ Ae kemiatho nunu Sairos kesoushü, mu a puo cha pete bie kemezhüshütuo; puo a nadiu chüshütuo, tsiu puoe thesu morei zhakhra le mo di, a kitako khashüwatuo, krodiko Jihovae siya.

¹⁴ Jihovae puya: Ijipt kinyi mu Ethiopia lhithovie, mu themia kerükrie Sabiako, n ki vortuo di n vie chütatuo, ukoe n siemedzitatuo; ukoe thegiro bu u phapfü vor di nuketsu n kelutuo. Ukoe n ki u mezhiemelo di; “Ukepenuopfü n rübei ze ketuo zo, mu kekrei jü; puo sie terhuo kekrei jü,” isituo.

Ukepenuopfü Puo Zo

¹⁵ He-i Israel Kepenuopfü, Kelakelieu, no sü n thuo n kevieyakecü Kepenuopfü puo zo ketho.

¹⁶ Uko pete bu rei thenga chü di u ziekejü chüta, terhuorhi kechüko keze bouübita.

¹⁷ Derei Israel we Jihova thuo kechachie kelakelieu se puo kelalie; nie bu telhetephou ketso rei thenga chü, mu nie ziekejü chülie lho.

¹⁸ Jihovae puya, teiko chükeshüu (puoe Kepenuopfü), kijüu rhishü mu chükeshüu (puoe süu chüpie kenhoukenyhashü mo, puoe themia bu balie kevi chüshü!) Ae Jihova, mu kekrei jü zo.

¹⁹ A kijü kezei puo nu pekhre di die pu mo; A Jakob nuosenuoyie ki, “A pfhü thedo chücie!” ishü mo. A Jihova, dietho puya, a puotoukecüu puya.

Terhuorhiko Babilon Kelalie Lho

²⁰ Nie kepekrolie di keze vorlie, penuo vorlie, nie lhiekelie seyieko! Uko kesikele jü, sei se terhuorhi kechü pie ketuoko, mu u kelalie kelho rhuo puo ki cha keba zo.

²¹ Pu pesishülie, nie nyieu pushülie; uko bu keze mharhü kekielie! Supuonie thiedzünu hau pushü ga? Supuonie thiedzütho nu süu pushü ga? Süu we a, Jihova thuo mo üme? A sie terhuo kekrei puorei tuo mo, kemiatho Kepenuopfü mu Kelakelieu; a sie kekrei ba mo.

²² Kijü vala pete, rürei a kitsa vorlie di nie kelaliecie! Ae Kepenuopfü zo, mu kekrei jü zocü la.

²³ A thuo rüseshüte, a tie nunu kemiatho nu die puo prate, die süu la vorlie lho. “Khoudza pete a ki khoutou tsutuo, meü pete rüsetuo.”

²⁴ A dze haikecü putuo, kemiatho mu kekuo Jihova gei keba zo; puo gei u nei mo keba pete, puo ki vor di mengatatuo.

²⁵ Israel nuosenuoyie pete Jihova geinu kuolie di zayie chütuo.