Isaya 44 - Angami Naga CL (Re-edited) Bible (BSI)

Israel gei Ukepenuopfü Jakeshü

¹ Derei tsie we rünyüliecie, he-i Jakob a kituou, Israel a puo kedakelieu!

² Jihova n chükeshüu, nuobvü nunu n rhikeshüu, mu n khruohishütuoükezhaue puya: Michie hie, he-i Jakob, a kituou, a thuo kedakelieu Jeshurun.

³ Ae keterhü kijüu gei dzü rushütuo, mu kijü keso-u gei rücüko khatsütuo; a a ruopfü rupie n nuosenuoyie gei shütuo, mu a theja khapie n yieu gei shütuo.

⁴ Ukoe nha kepejo the kepar tuoi zotuo, dzü krukezhü kerü khie sopfüciekhrie tuoi zotuo.

⁵ Mia puoe sie, “A Jihova vie” ituo, kekrei puoe Jakob za se puo thuo puo kietuo, sirei kekrei puoe puo dzie se “Jihova vie” idi thutuo, sidi Israel za pevielietuo.

⁶ Jihova, Israel Kediu, mu puo Rhakelieu, krodiko Jihovae puya: Ae therieu mu ae thelau; a sie terhuo kekrei jü.

⁷ Supuonie a mhie ga? Uko bu süu pushülie, uko bu a mhodzünu süu pushü mu se parshülie. Supuonie thiedzü nu vorketuoko pushü ga? Hasie chü vorketuoko uko bu hie ki pushücie.

⁸ Mha prei hie, morei michieta hie; a thiedzünu nie ki pu mu pesishüwata mo üme? Nieko a zhapuko zo! A kemo terhuo kekrei ba me? Tsiekrie kekrei puorei jü, a puo rei si mo.

Terhuorhi-e Kemethuo Zo

⁹ Terhuomiarhi chüyakecüko kemethuo phre mu uko mha se u nei bayakezhako puo kemevi jü; uko zhapukoe mha ngu morei si reiya mo. Süla uko pie thenga nu shüwatuo.

¹⁰ Supuonie mha kevi puorei chüya kemo terhuorhi morei mharhi rhi baya ga?

¹¹ Harie, puo kerüsuoko pete bu thenga chütuo, mu mhachü kesiko themia phre zo. Uko pete bu kehoulie, uko bu siethalie; uko kedewatuo, uko bu keze thenga chütuo.

¹² Rükreiue seidurüko chüya, puoe süu pie mizhü nu shüya, puoe metevü pie ketouya, puo bou kekuou pie rükreiya; puo va merütaya mu puo kekuo jütaya, puo dzü krie mo di phisiataya.

¹³ Sei mistiriue kero puo teshü kemezhüshüya, puoe kethusei pie rhieshüya, puoe randa pie nelieya, mu puoe kompas pie rhieshüya; puoe sünu themia rhi tuoikecü chüshüya, süu pie ruosuoki nu pie baketuo la puo chüpie themia kezivi puo tuoishüya.

¹⁴ Puoe sedarboko wilieya; morei puoe pedoubo morei phriebo kedalie di ketsa seiboko donu puo pesepie baya. Puoe sedar pelhoushü di teirü bu puo va pevishüya.

¹⁵ Süsie süu mia bu seidei chütaya. Puoe huo pie mi chü peguoya, huo pie michülie di niekhrüda rieya. Süsie puoe pie terhuo rhilie di süu rüsuoya; terhuorhi rhilie di puo mhodzü nerhutsu rüsuoya.

¹⁶ Ketoupuo pie mi chüya, ketoupuo geinu puoe themuo peguya, di süu cülieya tsiu puo kelhuo chülieya. Puo thuo mi peguo di sie, “Yha, a leliete, a mi nguwate!” ibaya.

¹⁷ Keshatsa pie puo terhuomia puo chülieya, puo terhuorhiu; sidi nuketsu di süu rüsuoya; puoe süu ki cha di, “A kelashücie, no sü a rhuou ze!” ibaya.

¹⁸ Ukoe silieya mo, morei uko lelieya mo; uko mhi bie kemawa, süla uko mha ngulie lho, mu uko bu mhalelie lho üdi uko nou bie kerübiwatakecü la.

¹⁹ Miapuorei leshüya mo, morei sie, “A süko ketou puo mi nu thewate, a puo mizhü geinu rei niekhrüda rielie, a themuo rei pegu cüliete; mu a keshako pie mha kerütse puo chüwatuo me? A seide puo mhodzünu nerhutsu rüsuotuo me?” ikecü pulieketuo mhasi morei mhale tuo mote.

²⁰ Puoe mige cü, bie penyakewa nou puo thuo puo cha tha kekrü ze tuote, mu puo thuo puo kelalie, morei sie, “A dzie a zatsa kecürü puo ba mo memu ha?” ikecü pulie si mote.

Israel Rükrakeshü

²¹ Hako rükraliecie, he-i Jakob, mu Israel, noe a kituou zo eru; a thuo n chüshü, no a thekeu zo; he-i Israel, a n rükra moketa chülie lho.

²² Ae n kejoko kimhou tuoi, mu n kephoumako mhoutsa mhiei he pejüwate, a ki la vorliecie, a n rhalieketa la.

²³ Keliliecie, he-i teiko, Jihova thuo süu chüshüketa la; shieshülie, kijüthouko; tsali chü parliecie, he-i kijü kelhouko, he-i, ketsa, mu sünu keba seibo kehoupuorei! Jihovae Jakob rhalie, tsiu Israel nu puo chü pezhashüketuo la.

²⁴ Jihova, n Rhakelieue, puya, nuobvü nunu n rhikeshüu: A sü Jihova zo, mha pete chükeshüu, puo rübei di teiko ciepetokeshüu, kijüu kelhakeshüu;

²⁵ Kecürüko thuophi pie kemethuo chüwa, mu thuophimia pie kenyamia chükewau; mhakesimia shü kerüreiwa, di uko mhasi pie kenya chükewau;

²⁶ puo kituou die chü kemeteishüyakecüu, mu puo dielieko pukeshüko chü tseikeshüu; Jerusalem ki pu di, “Sünu themia lhoutatuo,” ikeshüu, mu Juda nadiko ki, “Uko chü piesie lashütuo, tsiu uko kekako piesie lashütuo,” ikeshüu;

²⁷ dzü kesouu ki, “Sotalie, a n rüko chü pesowatuo” ikeshüu.

²⁸ Sairos ki, “Puo a kuopfheu, mu puo a medo pete chü tseishütuo,” ikeshüu, tsiu Jerusalem dze pu di, “Puo chü lalietuo,” ikeshüu, mu rüsuokiu dze pu di, “N mvüdzeu dzeshütuo,” ikeshüu.