Isaya 43 - Angami Naga CL (Re-edited) Bible (BSI)

U Rhakelieu Sü Jihova Rübei Zo

¹ Derei tsie we Jihovae puya, n chükeshüu, he-i Jakob n rhikeshüu, he-i Israel: Michie hiecie, a n rhalieketa la; a n za se n kie, no sü a vie.

² No dzü pfü kephi ki, a n ze tuotuo; mu kerüko pfü kephi ki, süko n vuwalie lho; mu no mi nu tuo kephi ki zorei n rielie lho, mu miüu n the pejüwalie lho.

³ Ae Jihova n Kepenuopfü zo, Israel Kemesau, n kelakelieu. Ae Ijipt se n rhalie, n sou nu Ethiopia mu Seba khashü.

⁴ Kekreilamonyü noe a mhi ki puoma re, mu therhu, tsiu a n khrieya, a n sou nu themia khashü, n kerheiro ze kelituo üdi seyieko khashü.

⁵ Michie hiecie, a n ze tuo zocü la; a niathutsa nu n nuosenuoyie ze vorshütuo, mu niakratsa nu n chü kengushütuo.

⁶ A pesotsako ki, “Uko khashüwalie,” sishütuo, mu pekhrotsako ki, “Khase ba zo hie, a nuo thepfuko petse nunu ze vorlie, mu thenuko kijü vala nunu ze vorlie.

⁷ A za üse kiekelie khe, a zayie la a thuo chükeshüko, a thuo rhi mu chükeshüko.”

⁸ Themia u mhicie rei u mhi nyikecüko, u nyie rüvü rei u nyie kenyiko ze vorlie!

⁹ Seyie pete bu vo kengulie, mu themiako bu kehoulie. Uko donu supuo hau pushülie vi, mu thiedzü vieko pekieshülie vi ga? Uko bu uko mezhü la zhapuko ze vorliecie, mu uko bu rünyü di, “Süu ketho” ilie.

¹⁰ Nieko a zhapuko zo, Jihovae siya, a thuo kedakelieu, a kituou zo, nie bu silie di a pelelie, mu a sü puo zo ücü silieketuo la. A mhodzü terhuo kekrei puorei chüshü mo, morei a sie rei puorei chüshülie lho.

¹¹ A sü a, Jihova zo, a kemosie kelakelie kekrei jü.

¹² Nieko donu terhuo kekrei tuo kemo ki, a thuo pushü, kelashü mu pesishü; tsiu nieko a zhapuko zo, Jihovae siya.

¹³ A sü Kepenuopfü zo, mu hasie rei a sü Puo zo; a dzie nunu shüphralie kevi miapuorei jü; ae mhachüya mu supuonie süu khalie ta?

¹⁴ Jihova, nie Rhakelieu, Israel Kemesaue puya: Nieko la a Babilon nu mia ketseshütuo, sidi cakhaseiko pete bietshewatuo, mu Chaldiako shiekeshü pie thekrü kechü chüwatuo.

¹⁵ Ae Jihova, nie Kemesau, Israel Chükeshüu, nie Kediu.

¹⁶ Jihovae puya, dzükezha nu cha puo chükeshüu, dzü kemeriekecü nu cha puo chükeshüu,

¹⁷ kierbagei mu kier, rüpfhünuo mu terhümiavimia ze parkeshüu; ukoe tsu zhüte, uko sielie kenjüte, uko pemhewate, mi puo tuoi ketuko pemhewate:

¹⁸ Thiedzü vieko rükra hie, morei mha keweko dze le hie.

¹⁹ Ae mha kesa puo chüshütuo üzhie; süu tsie the parzhie, no süu silie mo me? A rayha nu cha puo chüshütuo, mu kijükesia nu kerü chüshütuo.

²⁰ Nhachüko, meseruko mu ostrikko a rhutuo; ae rayha nu dzü khashü, kijükesia nu kerüko khashü, a kedakelie themiako bu krieketuo la.

²¹ A thuo a la chükeshü themiako bu a ketshe pu pesishüketuo la.

²² Sirei no we a kie mo, he-i Jakob; derei no we a mecüte, he-i Israel.

²³ Noe kethe ruosuo la tekuo se vor mo, morei n ruosuoko pie a rhu mo. Ae ruosuoko pie nie pie chü mo, morei nie bu kethengu thenu di nie keyhu mo.

²⁴ No raka pie ke kemou khrü a tsü mo, morei ruothoko shuou pie a nei chü mo. Derei noe n kephoumako pie a pie chü, n kerüzhüko pie a keyhushü.

²⁵ A, a sü Puo zo, a thuo a za la n kejokemouko vashüyakecüu, mu a n kephoumako rükra salie lho.

²⁶ A pejoshülie, uko keze dienya nu vo khe; n nyie pushülie, sitse noe mezhü ücü silietuo.

²⁷ N puonuo kerieko phoumawa, mu thedo nu kethako a zho vajowa.

²⁸ Süla ae kemesachüu nu keba kedinuoko perhuwa, a Jakob chüpie kepeka nu shüwa, mu Israel pie thetha nu shüwa.