Isaya 41 - Angami Naga CL (Re-edited) Bible (BSI)

Kepenuopfüe Israel Khruohituo ükecü

¹ Kemekrie di a pfhe rünyüshücie, he-i dzükezha khie kijüko; themiako bu u kekuo chü kesa laliecie; uko bu phirlie, di uko bu pushüliecie; uko pete keze thecau penuo vo khe.

² Supuonie niathutsa nu kuokelieu pesieshü, mu puo kiepie puo mhatho nu shüshü ga? Puoe seyieko khapie puo ki shü, mu kediko u phi khro nu kedewa; puoe puo zhiecha se uko chüpie nyophe mhiewa, puo theü pie uko bu rügu kepruo mhiewa.

³ Pue uko whuo vo mu kemichie jü zo di uko cie vo, puo phi kijü nyü kemo mhie zo di.

⁴ Supuonie sietse nu seyieko kielie, di mhatho hau chüshü ga? A, Jihova, therieu, mu thelau rei chütuo.

⁵ Dzükezha khie kijükoe süu ngu mu michieta, kijü valakoe perüsata; ukoe penuo phir di vor.

⁶ Mia puoe mia puo khruohi, mia puoe mia puo ki, “Thepfulie,” iphre.

⁷ Mhachükesiu rükreiyakecüu chü kethepfu, mu metevü pie mha vü kemejukecüue rükreitsie vüyakecüu chü kethepfu, sidi sie “Vü kema peviliete” ibaya mu uko gojal pie zhie di puo bu rünielie kelho chüshüya.

⁸ Derei no, Israel, a kituou Jakob, a thuo kedakelieu, a khrietho-u Abraham yieko,

⁹ Kijü vala nunu a thuo n ze kevor-u mu puo kethoko nunu kiekelieu, mu n ki, “Noe a kituou, ae n kedaliete mu n vawalie lho” ikeshüu;

¹⁰ Michie hie, a n ze tuo eru, thedzükouta hie, a n Kepenuopfü zocü la; a n chü pekuoshütuo, a n khruohishütuo, a a kemiatho dzie a zatsa pie n memhipielietuo.

¹¹ Uwe, n gei u nei moyakezha pete bu thenga mu u ziekejü chütatuo; n perhieyakecüko kemethuo mhie di katatuo.

¹² Noe n perhiekecüko pfhütuo, derei noe süko ngulie lho; n ze terhü chüyakecüko mhapuorei kemo mhietatuo.

¹³ A, Jihova n Kepenuopfü zocü la, n dzie n zatsa teshü tuoya; ae n ki, “Michie hie, a n khruohishütuo,” ikeshüu zo.

¹⁴ Michie hie, no Jakob zocüu, nie Israelmiako! A nie khruohishütuo, Jihovae siya; nie Rhakelieue Israel Kemesau zo.

¹⁵ Ae tsie n chüpie liekenyü nya puo chüshütuo; methe, kesa mu puohu kenyi puo; noe kijüthouko vü di süu bietshiewatuo, mu no kijükhruko pie shübe mhiewatuo.

¹⁶ Noe uko heshütuo mu teikhrie thuo uko pietatuo tsiu khriewhi uko hepie cürewatuo. Sitse no Jihova nunu n neituo; Israel Kemesau nu no zayie chütuo.

¹⁷ Kejüketsopfhümia dzü pfhü di pfhü pejükeba ki, mu keterhüpfü puo meü sotoketa ki, a, Jihovae uko pfhekhoshütuo, a, Israel Kepenuopfüe uko khawa lho.

¹⁸ A tsiekrie kerükrieko gei kerüko chüshütuo, mu razhako nu dzüluo khashütuo; a rayhau pie dzükhou puo chüshütuo, mu kijü keso-u pie dzüluo chüshütuo.

¹⁹ A rayha nu sedar, akasia, mürtel mu oliv seshütuo; a kijükesia nu saipres, mezapu mu tehoubo pelhou kesashütuo.

²⁰ Sitse mia pete-e, Jihova dzieu thuo hau chüshü ücü, mu Israelko la Kemesau thuo süu chüshü ücü, ngu di silie, mu medoshü di lelietuo.

Ketho kemo Rhuoko

²¹ Nie nyieu khashülie, Jihovae siya; nie zhapu dieko se vorlie, Jakob kediue siya.

²² Uko bu süko se vorlie, di kedipuo chütatie shikecü hie ki pucie. Thiedzü chüketako, hie ki pushücie, ukoe kikemhie shi, sitse hie süko dze medolietuo, sidi süko geinu mha kepar-u silietuo; morei mha vorketuoko hie pesishücie.

²³ Hasie kedipuo vortie shi hie ki pushücie, sitse hie nieko terhuomia zo ücü silietuo; mha kevi chüshüyi, moro mha kesuo chüshücie, sitse hie michie mu merietatuo.

²⁴ Nieko sü, ketho nu, mhapuorei mo, mu nie mhatho sü kemethuo zo; nie kedakeliemia kehoupuorei kerütse zo.

²⁵ Pesotsa nu a mia puo ketshüshü, mu puo vorte, niaki kethu nunu puo za kietuo. Puoe kezhako kedepie nyoba kedekecü mhie zotuo, litho-ue linyo kedekecü mhie zotuo.

²⁶ Supuonie sietse nu, mu pedzüperie pu, di u bu “Puoe ketho zo,” idi pu ga? Miapuorei süu pukeshü jü, miapuorei pesishü mo, miapuorei nie dieko sishü mo.

²⁷ Ae perie Zion ki pushüwate, mu a Jerusalem ki dieliekevi pheshie puo khashü.

²⁸ Derei a meho sie ru miapuorei jü; hako donu mia ketarho puorei jü, a u ketso ro, mia die kelakeshü jü.

²⁹ Mo zo, uko pete mha u ketsikecü puo zo; uko mhathoko kemethuo zo; uko terhuorhiko teikhrie kemethuo zo.