Isaya 40 - Angami Naga CL (Re-edited) Bible (BSI)

Ukepenuopfü Themiako Nou Thupeluokeshü

¹ Thupeluoshülie, harie, a themiako nou thupeluoshülie, nie Kepenuopfüe siya.

² Menenuoi di Jerusalem ki pushücie, mu puo ki rükhruoshülie, puo meseu chüwata ücü, puo gei kejo mau chü tseishüwate, puoe puo kephouma pete la Jihova dzie nunu süde ma kenie ngulieta ücü.

³ Mhapfhe puo shiekhouishü: “Rayha nu Jihova cha keseliecie, kijükesia nu úko Kepenuopfü la chadi puo chü kemezhülie.

⁴ Razha pete piesiewatuo, tsiu kijüthou mu kijükhru pete bie kerünuowatuo; kijü kemetha kemoko luo kemethawatuo, tsiu kemehieko bie kemejuwatuo.

⁵ Sitse Jihova zayieu pie pekieshütuo, mu themia pete keze süu ngutuo, Jihova tie thuo süu pushüwaketa la,” si.

⁶ Mhapfhe puoe sie, “Shieshülie!” si. Ru ae sie, “A bu kedipuo pu shie ta?” sishü. Themia pete rei nha zo, puo balie kevi-e lie nu nhapou mhie zo.

⁷ Nha rüwitaya, nyiepou rataya, Jihova thesü pie puo hekeshü ki; themianuo ha nha zo ketho.

⁸ Nha rüwitaya, nyiepou rataya; derei Ukepenuopfü die kechachie ba zotuo.

⁹ He-i Zion, dieliekevi se kevor-u, n thuo kijüthou kerükrie puo gei siecie; he-i Jerusalem, dieliekevi se kevor-u, n rhiechü di melieshücie, süu piesielie, michieta hie, Juda nadiko ki pushülie; “Harie nie Kepenuopfü.”

¹⁰ Harie, Niepuu Ukepenuopfüe kekuo se di vorzhie, mu puo la puo boue mha kekhaya; puo zhakhrae puo ze tuo, mu puo thesu kechü puo mhodzünu tuo.

¹¹ Kuopfheu tuoi puoe puo kuoko vachütuo; tekuonuoko kengupie puo bou nu shülietuo, tsiu puo merü geinu uko pietuo, mu puo krüko menuo di ze tuotuo.

¹² Supuonie puo dziezhü kerükou nunu dzü mejülie, mu puo pfü pie teiko mejülie, kijü nu nyopheko pie zharha puo nu shülie, mu roshükhou nunu kijüthouko mejülie, mu mha kemejü nunu kijükhruko mejülie ta?

¹³ Supuonie Jihova ruopfüu cha thashü, morei puo ketarho-u chü di puo pethashü ga?

¹⁴ Puo mhasi kemecielieketuo la supuo rüsa, mu supuonie kemezhü chau pie puo pethashü ga? Supuonie kesikele pie puo petha, mu puocapuola sikelie chau tha puo kie ga?

¹⁵ Seyieko zorei lipfhü puo nu dzü kepo yopuo tuoi zo, tsiu mha mesi kemejünya gei nyophe mhie zo; legei, puoe nyophe kememhie tuoi kijü rüchütsokemoko pieliezhü ho.

¹⁶ Lebanon zorei seidei la tso mo, morei puo khunuoko rei kethe ruosuo la tso mo.

¹⁷ Seyieko pete rei puo mhodzüki mhapuorei kemo mhie zo; puoe uko pie mhapuorei kemo mu kemethuo ki rei le petsakuoya.

¹⁸ Siro nie Ukepenuopfü üse supuo mhieü morei mha kikecüpuo pie puo ze kemejütuo ga?

¹⁹ Terhuorhi üme? Mhakechüue süu chüshü, mu rükreiue suna pie puo kenheshüya, tsiu rakachü pie puo cüko chüshüya.

²⁰ Mia puoe mha methuo khakeshü la sei rietalie kelho kedalieya; sidi mhachü kesimia pfhülie di rünielie kelho mharhi puo chülieya.

²¹ No si mo me? No rünyülie mo me? Therie nu nie ki pu mo me? Kijüu chülie tse nunu nie lelie mo me?

²² Puoe kijü kemetouu mho bayakecüu, mu puo mhinguki we sünu kelhoukoe kusoü mhie zo; puo pfhe puo tuoi teiko kelhashüya, mu baketuo la pfheki puo tuoi uko pethoushüya;

²³ kedinuoko pie kemethuo chükewau, mu kijüu kekhayakecüko pie kemethuo chükewau.

²⁴ Ukoe leishü, ukoe seshü mumetha, uko mie kre kijü tsu mumetha, puoe uko mheshü di uko bu rüwita, sidi rügu puo tuoi khriewhi bu uko heseta.

²⁵ Siro nieko a pie supuo ze kemejü ta, morei a ü supuo ze ketou ütuo ga? Kemesaue siya.

²⁶ Nieko mhipie kerükrie gei mehoshü phi: Supuo hako chüshü ga? Uko krodiko phrü di ze parkecüu uko za se uko pete kieyakecüu; kekreilamonyü puo kekuoe zha; puo kekuoe metei, puorei tso kemo jü.

²⁷ Kiüdi noe sie, he-i Jakob, mu he-i Israel, “Jihova kinu a chau kevieliete, mu Ukepenuopfüe a mezhüu leya mo?” ikecü pu ga?

²⁸ No si mo me? No rünyü mo me? Jihovae kechachie keba Ukepenuopfü kijü kelako rei chükeshüu. Puoe mezie morei puo nyietaya mo, puo noule-e pfhü ketsokeliepfü mo.

²⁹ Puoe kekuo khapie mezieketako tsüya, mu kuo kemoko chü pekuoshüya.

³⁰ Khriesarüüko zorei mezie mu u nyietatuo, mu medzü ba rei lho di tetsutatuo.

³¹ Derei Jihova khremerü kebako we u kekuo chü kesalietuo, ukoe tsüü tuoi u shü pfü thu sietuo, uko tatuo mu u nyietalie lho, uko cha tuotuo mu mezietalie lho.