Isaya 4 - Angami Naga CL (Re-edited) Bible (BSI)

¹ Sünhie thenumia thenie-e thepfumia puo merhashülie di, “Hie hie thuo hie vie cütuo mu hie thuo hie pfhenei setuo; hie bu n za sekelie zorei chücie, hieko thethau setacie,” ituo.

Jerusalem Siedze Vithedze Chü Keba

² Sünhie Jihova co-u zivi mu vithedze chütuo, mu kijü siu pie Israelmia lhiekelieko mhokuo mu uko mho chütuo;

³ kehoupuorei Zion nu mu Jerusalem nu lhiepiekebako üse mesa üdi kietuo, kehoupuorei puo phou la Jerusalem nu puo za thulieketau.

⁴ Niepuue capi ruopfü mu thekecü ruopfü se Zionpfüko kerhu khrü kemesawa mu Jerusalem dapfüketuo thezieko chü kemesakewa nhie.

⁵ Jihovae Zion kijüthou pete mho mu puo kehou kezhako mho khinhie gei kimhou mu mikhu, theva gei miü kezie puo chüshütuo; siro vithedze kechü pete mho keya puo batuo.

⁶ Süusü khinhie gei kele keya puo chütuo, mu teirüteikhrie nunu rüzhükelie puo chütuo.