Isaya 39 - Angami Naga CL (Re-edited) Bible (BSI)

Babilon nu Kevor Dielieko Zekelie

¹ Süteiki Babilon kediu Merodak-baladan, Baladan nuoue dieliemia ketseshü di uko bu leshü mu mha pie Hezekia ki vor, puoe Hezekia mhachü ba di vi lalie ücü sikelie la.

² Siro Hezekia puo nei di uko zelie; sidi puoe puo kinyiko, rakachü, suna mhare keviko, tier puoma kereko, puo rünyieko pete, mu puo nya kiko nu keba pete pie uko pekieshü; puo kinu keba morei puo kedi nu keba mhapuorei Hezekia pie uko pekie mo di khawa mo.

³ Süsie Isaya siedzekesiue Hezekia kediu ki vor di sie, “Themia hako kedipuo pu ga? Siro uko kirapuo nu vor ga?” ita. Sitse Hezekia la sie, “Uko rüna kepecie se Babilon nunu a ki vorlie,” si.

⁴ Siru puoe sie, “Uko n ki nu mha kikecüpuo ngu ga?” si. Hezekia la sie, “Ukoe a ki nu keba mha peteko nguwate, a mhaboukiko nu keba a pie uko pekie kemo puorei ba mote,” si.

⁵ Sitse Isayae Hezekia ki, “Krodiko Jihova die rünyüliecie:

⁶ N kinu keba mha pete, n puonuokoe thie ketso kengu se kevor pete, pie Babilon nu votaketuo teisozhako vorzhie; mhapuorei peshashülie lho, Jihovae siya.

⁷ Siro n nuo thepfu penuopie n ketsü huo zetatuo; mu uko bu Babilon kediu kediki nu iunukmia chü di batuo.”

⁸ Sitse Hezekiae Isaya ki, “Jihova die pukeshüu sü vi zo,” si. Puoe lekecü, “A teiki we kezekevi mu khrukhre di ba zotuo,” ikeba la.