Isaya 38 - Angami Naga CL (Re-edited) Bible (BSI)

Hezekia Suokelie

¹ Süteiki Hezekia mhachülie di siata nyünuo zhüta. Amoz nuo Isaya siedzekesiu puo ki vor di puo ki, “Jihovae puya: N kiu chüpie puotou nu bawalie, kekreilamonyü no siatatuo, no shürho lalie lhote.”

² Siru Hezekia puo zie kereipie sozhatsa va di Jihova ki cha di sie,

³ “He-i Jihova, a n ki chaya, ae dietho zo, a nou pete se n tsü zo vor, n mhodzüki vi ükecüko chü vor zo.” Sidi Hezekia kra phita.

⁴ Sitse Jihova die Isaya ki vor di sie:

⁵ “Vo di Hezekia ki pushücie, Jihova, n puou David Kepenuopfüe puya; A n kecha sishüte, a n mhidzü ngushüte; a cie kerepengou pie n kelhouzha bashütuo.

⁶ Ae Asiria kediu dzie nunu no mu nadi hau shüphralietuo, mu nadi hau rüguolietuo.

⁷ “Hauha Jihova kinu kevor n la zasiu tuo, Jihovae puo die phrakeshü mha hau chüshü zotuo.

⁸ Harie, ae Ahaz vie niaki khrü kemeho-u geinu mehokeshü, niaki letazhücüu khrü bu phicha ker tsiesie lashütuo.” Sidi niakiu khrü kemeho-u gei phicha ker puo leketa de tsiesie lashü.

⁹ Judako kediu Hezekia mhachü ba di shürho lakelie sie thukeshü:

¹⁰ A pukeshü; a teisozha khinhieluo ki a tuota morosuo beite; ae Sheol kharuko nu letatie a teicie keshako la.

¹¹ A pushü, ae kerheimia kijüu nunu Jihova ngu sa lhote; ae kijü hau nu kelhou themianuo ngu sa motatuo.

¹² Tekuo kepfhemia pfheki puo tuoi, a keba kiu a kinu phepiete; pfhekedomia puo tuoi a kelhou tshüliete; puoe jüreiba geinu a betheliete; khunhiekhuzhü donu no a pejüwate.

¹³ A teikeso ketso kekhruo cha; puoe losha tuoi a ru pete bietshewate; khunhiekhuzhü donu no a pejüwate.

¹⁴ A kitienuo morei zemvüü tuoi ruo, a mekhru tuoi meheimelo. A mhi-e pekhra mha meho puo nyiete, he-i Jihova, mia a pesethorte; no a keyau chülieyi!

¹⁵ Derei a kedipuo pulie ta? Puoe a rüchüwate, mu puoe puo thuo süu chüwate eru. A ruopfü kemezhiecü la a keze pete tate.

¹⁶ He-i Jihova, themia hako se di lhou tuoya, mu hako geinu a ruopfüe rhei keba zo. Oh, a chü keshürho lashü di a bu rheiliecie!

¹⁷ A thenou ketsopfhü ngukelie pete a dzevi la ketho zo; derei noe kepeka kheho-u nunu a kerheiro teshü laliete, noe a kephouma pete kelhoupie n sietsa shüwate.

¹⁸ Sheol n thezielie kenjü, kesiae n tshelie kenjü; Kheho nu tsuketako we n dietho-u merülie kenjü zo eru.

¹⁹ Rheikebau, rheikebau, ukoe n tshezhie, a thie chü keba tuoi; miapuonuoe u kedietho-u pie u nuonuo pesishüya.

²⁰ Jihovae a kelalietuo, mu we u rhei chie Jihova kiu nunu puo rhü kenyi übouko se di tsali chütuo.

²¹ Sitse Isayae sie, “Uko bu chiedesi da puo pie puo tichüu vashücie, siro puo shürholietuo,” si.

²² Siro Hezekia pu sacü, “A bu Jihova ki nu khotuo ükecü zasiu kedipuo ga?” sita.