Isaya 37 - Angami Naga CL (Re-edited) Bible (BSI)

Hezekia Isaya Ketsokecü

¹ Kediu Hezekiae süu sishü tse, puo pfhe cierha di gakhropfhe pie puo whelie, sidi Jihova kinu le.

² Sidi puo kediki mhokezhau Eliakim mu kethuu Shebna siro phichüko donu thetseiko bu gakhropfhe dzielie di, uko ketsepie Amoz nuou Isaya siedzekesiu ki shü.

³ Ukoe puo ki, “Hezekia pucü, thie kemezhiekecü teisozha, mia kerhiekecü die, mu thenga chükecü; penuoketuo nuonuoko, derei penuoshüketuo kekuo tuo mo.

⁴ Rabshakeue puo niepuu Asiria kediu bu rhei ketuo Ukepenuopfü kengashünu di puo ketsekeshü mu puo dieko Jihova n Kepenuopfü sishüte; süla lhiekelieko la no kecha chüshücie,” si.

⁵ Kediu Hezekia thekeko Isaya ki vor tse,

⁶ Isaya sie uko ki “Nieko niepuu ki pushülie, ‘Jihovae puya: No sikelie dieko, Asiria kediue pesekecü dieko la michie hie.

⁷ A thuo ruopfü puo pie puo nou shüshütuo, di puo bu diekrie si di puo kijü nu la votatuo, puo bu puo thuo puo kijü nunu zhiecha geinu siatuo,’ ” si.

⁸ Rabshakeue la vor, ru Asiria kediu Libna ze kegei keba ngulie; puoe kediu Lakish nu ba mota ücü sikelie la.

⁹ Sitse kediue Ethiopia kediu Tirhaka dze sikecü, “Puo n ze kegeituo üdi tuoshüte ho,” si. Siro puoe süu silie tse, puoe dieliemia ketsepie Hezekia ki shü di pucü,

¹⁰ “Nieko hamhie di Juda kediu Hezekia ki pushücie: No puo pele keba n Kepenuopfü bu n sewa hie, Jerusalem pie Asiria kediu dzie nu shüwalie lho üdi phrakeshüu.

¹¹ Harie, Asiria kedikoe kijü pete gei kedipuo chüshü vor shikecü mu uko pekapemhewakecü nie sishüte, siüro nie shüphralie viü ba me?

¹² A puonuokoe pekawaketa seyieko, Gozan, Haran, Rezef mu Telasar nu keba Iden themiako, seyie süko rhuokoe uko shüphralie üme?

¹³ Hamat kediu, Arpad kediu, Sefarvaim nadi nu kediu, Hena kediu morei Iva kediu kirapuo bata ga?”

Hezekia Kecha

¹⁴ Hezekiae dielieko dzie nunu leshüu ngulie, di phrüshü; sidi Hezekiae Jihova kiu nu kho di leshüu lhapie Jihova mhodzünu shülie.

¹⁵ Sitse Hezekiae Jihova ki cha di,

¹⁶ “He-i Krodiko Jihova, Israel Kepenuopfü, Cherubko mho kediba gei kebau, kijü nu kedi pete mho, n rübei Ukepenuopfü zo; noe tei mu kijü chüshüe.

¹⁷ He-i Jihova n nyie kedeishü di rünyüshüyi; he-i Jihova, mhirhoshücie di mehoshücie, sidi Senacherib-e rhei ketuo Ukepenuopfü kretuo üdi ketsekeshü dieko rünyüshücie.

¹⁸ Ketho zo, he-i Jihova, Asiria kedikoe seyie pete mu uko kijüko pekawate,

¹⁹ mu u rhuoko kelhoupie mi nu shüwate, kekreilamonyü süko terhuomia mo, derei themia dzie mhatho sei mu ketsie zo, süla uko pekawate.

²⁰ Süla tsie, he-i Jihova hie Kepenuopfü, puo dzie nunu hie kelaliecie, sitse kijü nu kedi pete rei n rübei Jihova ücü silietuo.”

²¹ Sitse Amoz nuou Isaya mia ketsepie Hezekia ki shü di sie: “Jihova Israel Kepenuopfüe puya: Noe Asiria kedi Senacherib la a ki chakecü la,

²² Jihovae puo dze pukeshü dieu hau: “ ‘Puoe n rütseya, puo n krenyüya Zion nuo phousepfü; puoe n sietsa nu tsüge thaya, Jerusalem nuopfü.

²³ “ ‘No supuo kre mu pu pesuoya ga? No supuo petsou di n pfhe kerükrie mu kemiako di n mhi pelapie ba ga? Israel Kemesau petsou di!

²⁴ N kituoko geinu no Jihova krenyü, di noe sie, “A kierbagei kekra bakecü ze di a kijüthou kerükrieko gei khowate, Lebanon thechü kesouko nu tsuwate; ae puo sedarbo kerükrieko, puo saipresbo kevithoko wiwate; ae puo thechü kerükrie kepecietho gei khowa, mu puo tsa kedeitho nu lewate.

²⁵ A dzükhou ho mu dzüko ücü, a a phizhü pie Ijipt rüko nu dzü pete bie pesowa.”

²⁶ “ ‘A thiedzütho nu rhüse tuoketa no si moluo me? A tsie chü vorkezhüko thiedzütho nu rhüse tuote, n bu dahou nadiko bierhuo kesekebawatuo üdi.

²⁷ U themiako u kekuo jü di u ziejü mu rübvürübieta, mu lie nu nha mhiei, mu nha kemene tuoi, kizüko gei keba nha rüchülie kemonu rüwiketa tuoi.

²⁸ “ ‘Ae no siekecü mu no baketsu, n kepra mu keler tsiu a gei n nou rüpe keba siya.

²⁹ Kekreilamonyü no a perhiekecü, mu kemelhakecü vor a nyie tsote, a cawi pie n nyhü nu shütuo mu kier mekedouu pie n me doutuo; a n shükerei lapie no kevor chau nu shüwatuo.

³⁰ “ ‘Siro hau n la zasiu chütuo: Ciethie puo thuo lhoukelieu cülie, mu cie kenie cie süko geinu lhou kepar-u; süsie cie seu cie tsia prushülie di relie, mu khubelieko cielie di puosi cülie.

³¹ Juda kinumia lhiekelieko puomie kre pesu tsutuo, mu puosi vü pekhra latuo;

³² Jerusalem nu lhiekeshüko, mu Zion kijüthou geinu lhiekelie kro puo praketuo la. Krodiko Jihova shürheiu thuo hau chüshütuo.

³³ “ ‘Süla Jihovae Asiria kediu dze pucü: Puo nadi hau nu vorlie lho, theütsie puorei cielie lho, pezhü pfü di süu mhodzü phirlie lho, morei puo reketuo la terhüba pesielie lho.

³⁴ Puo kevor chau, süu ze di puo latatuo; puo nadi hau nu vorlie lho, Jihovae siya.

³⁵ Ae nadi hau yalie mu pekrulieketuo la, a thuo a la mu a kituou David la.’ ”

Senacherib Penyü mu Dukhrikewa

³⁶ Sitse Jihova dielieu pra di Asiriako razhüchü nunu uko mia lakh puo di nyie hiethethaepengou dukhriwa; sidi teisolie tse, uko pete kesiamo zota.

³⁷ Asiriamia kediu Senacherib tuo puo kinu vota di tsu Ninevi nu lhouta.

³⁸ Siro puo ki nu puo rhuou Nisrok rüsuo ba ru puo nuonie Adramelek mu Sharezer zhiecha pie puo dukhriwa, di ta Ararat kijü nu vota. Mu puo nuou Esar-hadon puo sou nu kedi chüta.