Isaya 36 - Angami Naga CL (Re-edited) Bible (BSI)

Senacherib-e Jerusalem Whuokecü

¹ Hezekia kediu dikelie cie keredia cie, Asiria kediu Senacherib khor Judamia dahou pete whuo di süko lielieta.

² Sitse Asiria kediue Lakish nunu Rabshakeu ketsepie Jerusalem nu Hezekia kediu ki shü, chüpahi kekra sa di. Sitse puoe Pfhekemenyiu Phiechü lie nu kekho chau rüzie peso-u dzüyie thela ki thalie.

³ Sitse sünu Hilkia nuou Eliakim kinu mhokezhau, mu kethuu Shebna, mu Asaf nuou Joah, thedzethuyakezhaue puo ki khor.

⁴ Sitse Rabshakeue uko ki, “Hezekia ki pushücie; Asiria kedi kezhaue puya: No kedipuo pele di thepfu hai ba ga?

⁵ No die rübei se terhü nu thedo mu kekuo chülie thenyüsie me, no supuo pele di a perhie petsouya ga?

⁶ Harie noe Ijipt pele tha die, tekhriethe tseketau, puo vakhrie kephimia kehoupuo dzie rei zewaya. Ijipt kediu Faro gei rüzhü ketha kehoupuorei sümhie zotuo.

⁷ Derei mhanuü no a ki, ‘Hie Jihova hie Kepenuopfü pele tha,’ iro, Hezekiae puo thechü kerükrieko mu ruosuobako bierhuowa di Juda mu Jerusalem ki, ‘Nie ruosuoba hau mhodzü nunu rüsuotuo,’ ishü mo üme?

⁸ Süla tsie vorlie, a mhokezhau Asiria kediu ze mhapuo pepi toulie: Ae kier nyie kenie pie n tsüshütuo, no n yatsa seketuo themia pfhülie vi ro.

⁹ No kier mu kierchüpahi la rei Ijipt pele kethachie kikidi a niepuu liethoko donu kecütho kriemhokezha puorei whuolie vituo mu?

¹⁰ Sizomonyü Jihova sa mo di a kijü hau pekatuoü petsou khor me? Jihovae a ki pucü, kijü hau petsou kho di puo pekawalie,” si.

¹¹ Sitse Eliakim, Shebna, mu Joah sie Rabshakeu ki, “N pezie rei Aramaik nunu n kituoko ki pushücie, hie süu si ba; dahou nu mia kesi kinu Judamia die nunu hieko ki mha pu hiecümu,” si.

¹² Derei Rabshakeu sie, “A niepuue a bu n ki mu n niepuu ki sie, themia dahou gei kebako, nie ze di u buo cü mu u pezu krietaketuoko ki pu hienu di a ketseshü me?” sita.

¹³ Sitse Rabshakeu siethalie di Judamia die nunu shiekhoui di, “Kedi kezhau, Asiria kediu dieko rünyüliecie!

¹⁴ Kediue puya: ‘Hezekia bu nie sewa hiecie, puoe nie shüphralie lho.

¹⁵ Hezekia bu nie ki, Jihova u shüphralie zotuo, nadi hau pie Asiria kediu dzie nu shüwa lho zo, ikecü pu di nieko Jihova khremerü bata hiecie.’

¹⁶ Hezekia pfhe rünyü hiecie, Asiria kediue pucü: ‘A ze vitho chüwalie di a ki partalie; sitse nie kehoupuorei nie thuo nie khubebo-u mu chiedebo-u geinu cütuo, mu nie thuo nie dzübou nunu dzü krietuo,

¹⁷ a vor di nieko ze nie thuo nie kijü mhiekecü puo nu, telha mu khubezu kenyi kijü puo, kecüca tsiu khubelie kenyi kijü puo nu volie kemochie.

¹⁸ Hezekia bu, “Jihova hie shüphralietuo,” ikecü pu di nie cha tha kekrüwa hie. Seyieko rhuo huo Asiria kediu dzie nunu puo kijü shüphralie üme?

¹⁹ Hamat mu Arpad rhuoko kirapuo tuota ga? Sefarvaim rhuoko kirapuo tuota ga? Sükoe a dzie nunu Samaria shüphralie me?

²⁰ Rüna hako rhuoko donu suomianie a dzie nunu u rüna shüphralie üdi Jihovae a dzie nunu Jerusalem shüphrashütuoü ba ga?’ ” sita.

²¹ Derei ukoe kemekrie di dieca puorei pu puo die kela mo, kekreilamonyü kediue, “Puo die kela hiecie” idi die khakeshü la.

²² Sitse Hilkia nuou Eliakim, kediki mhokezhau mu kethuu Shebna mu Asaf nuou Joah, thedze kethuu uko pfhe cierha zo di Hezekia ki vor Rabshakeu dieko pie puo ki pushü.