Isaya 35 - Angami Naga CL (Re-edited) Bible (BSI)

Rhakelieko Zion nu La kevor

¹ Rayhau mu kijü keso-u u neituo, kijükesiau puo nei di pou partuo; terhuobiepou tuoi,

² puoe pou phi zotuo, sidi puo keneipfü kelituo. Lebanon zapuzayieu pie puo tsütuo, Karmel mu Sharon mesümede keba. Ukoe Jihova zapuzayie ngutuo, Ukepenuopfü kekuo kezhau.

³ U dzie kethachüko chü pekuoshülie, mu u khoudza kemezieko chü kemeteishülie.

⁴ U melou kesuoko ki hakemhie pushülie, “Meteilie, michie hie! Haki nie Kepenuopfü ba. Puoe khepu mu zhakhra kemeriekecü se vortuo. Puoe vor di nie kelalietuo,” si.

⁵ Sitse mhicieko mhi vilietuo, mu nyievüko nyie rüvü motatuo;

⁶ sitse phiyho-u chüzhie tuoi rüthe tuo, mu keliehuou puo keneipfü kelituo. Rayhau nu dzüko rüluo partuo, mu kijükesia nu rücü dzüko krutuo.

⁷ U thekezhü huocanyoko dzükhou chütatuo; mu keterhü kijüu dzüluo rüluotatuo, meseruko ketuo chüu guodzü chütatuo, nhako tekhrie mu zovü chütatuo.

⁸ Sünu chaü puo batuo, mu süu pie Kemesa Chau üdi kietuo; mesa kemoko sügei rüve volie lho, derei sügei Ukepenuopfü themiako la zotuo; rüvemia puorei, kenyamia zorei sünu tuo kekrütalie lho.

⁹ Sünu losha puorei balie lho, morei mha tekecü khunuo sünu parlie lho; sünu süko puorei ngulie lho, derei rhalieketako sünu tuotuo.

¹⁰ Sidi Jihova rhakelieko la vortuo, mu Zion nu keli vortuo; kechachie u kenei pie u tsü gei shü di; ukoe u kenei mu u dzükezie ngulietuo, tsiu nousuo mu meheimelokecü ta kepecie nu votatuo.