Isaya 34 - Angami Naga CL (Re-edited) Bible (BSI)

Ketsokecüu pie Seyieko Gei Keshü

¹ He-i seyieko, penuo vorcie rünyüketuo la; harie themiako, rünyüliecie! Kijüu tsiu sünu ketshu chü keba pete; kijüu mu sünunu kevor pete bu rünyüliecie.

² Jihovae seyie pete gei puo nei mote, mu u rüpfhünuoko gei puo nou meyie phite; puoe uko pejowate, uko khapie dukhrikewa nu shüwate.

³ Uko dukhrikewako kelhouwatuo, mu uko moko kecie re mena siertuo; kijüthouko gei uko zie thuo krutuo.

⁴ Teigei krodiko pete zeüjütatuo, mu teiko leshütshü puo tuoi tshüpfü khotatuo. Uko krodi pete mezietatuo, khubenyü rüwitayakezha tuoi morei chiedesi kitayakezha tuoi.

⁵ A zhiechaue teigei nu krie mezelie tse, legei, süu Edom gei kertuo, a pejokewa themiako gei capi chüshütuoü.

⁶ Jihovae zhiecha puo ba; süu thezie thuo tshutuo, cüpie luotshüpfü, tekuonuo mu temvü zie üse, tekuochü mecü shuo üse. Kekreilamonyü Jihovae Bozra nu ruotho puo chü, Edom kijü nu kedukhri kezha puo sier.

⁷ Nha thudoko rei süko ze tetsutuo, mu thudonuoko rei thudo kezhako ze di. Uko kijü thezie pie petsetuo, tsiu uko nyo chüshuo pie va pevi se tuotuo.

⁸ Jihovae khepu teisozha puo ba, siro Zion nyieu la zhakhra khashüketuo teicie puo ba.

⁹ Edom rüko the pezhapie alakatar, mu puo nyo mitsie mevitatuo; puo kijü pie tukezhü alakatar mhieiwatuo.

¹⁰ Theva rei khinhie rei süu mhelie motatuo; puo ketuu khu sei zhü zotuo. Phou puo sie phou puo nu zorei süu ruozhü zotuo; miapuorei tuose süu pfüthe sa motatuo.

¹¹ Derei rümou mu chiekru kecütho thuo süu pebalietuo; puchüü mu shüzha kezhau sünu batuo. Puoe kebvükecü ro-u teshüpie sügei zo voshütuo, mu rübvürübiekecü lo pie pehüko gei shütuo.

¹² Ukoe süu za pie “Sünu Kedirüvie Jü” isituo, mu puo kedinuoko kemethuo phre zotuo.

¹³ Puo dahouko gei zohu lhoutuo, puo kudako gei zozie mu kikhahuko lhoutuo. Süu meseruko tuo chütatuo, mu ostrikko kebachü chütatuo.

¹⁴ Chücükoe hainako ze kesetuo, temvü-rhuoko re huoniehuo kietuo; sünu teizeirhuopfü vor balietuo di puo rüleiba puo chülietuo.

¹⁵ Sünu puchüü puo kru chü mu pedzütuo, tsiu kolie di puo nuonuo kengupie puo khrükhro shütuo; sünu rümouko vo kengutuo, puokrüpuodzü kesiedzi di.

¹⁶ Jihova leshüdau nunu pfhü mu phrüliecie: Hako puorei tsei kemo chülie lho; puorei puo peza kejü chülie lho. Jihova tie thuo die khashüte, mu puo ruopfü thuo süko kengulieketa la.

¹⁷ Puoe uko la dapeshüte, puo dzie nu kero se di kezapie uko tsüwate; ukoe kechachie süu pevielietuo, phou puo sie phou puo idi ukoe sünu lhoutuo.