Isaya 33 - Angami Naga CL (Re-edited) Bible (BSI)

Jihovae Kelakelie Se Kevor

¹ Ce, no mha kepekau, kepeka n gei vor kemo-u; no kecürüu, mia bu n sekeda kemo-u! No mha peka moketa nhie, n pekawatuo; mu noe cürü moketa nhie, mia n sekedatuo.

² He-i Jihova, hie ngumezhiecie; hie n pfhe ba zo. Teisoduü hie bou chüliecie, kemezhiekecü ki hie kelakelieu chüshücie.

³ Keboukecü pfhe sishü tse, themiako tata; n kekuo kezha mhodzünu, seyieko cüretaya.

⁴ Zope-e vo kepelepfü bayakecü tuoi; mha vakelieko kengulieya, kuprie keprou tuoi, ukoe prou puo gei vaya.

⁵ Jihova meyieliete, puoe kerükrie gei baya; puoe kemezhü mu kemiatho se Zion ketshu chüwatuo.

⁶ Puoe n teiu nu rüsierünie kemo-u chütuo, kelakelie, mhasi mu kesikele rei kha phishütuo. Jihova keprei pie Zion kinyi chütuo.

⁷ Harie! terhümiaviko chadi nu krazhie; vitho dielieko kra phizhie.

⁸ Chapfüchaüko nu tuo mote, rüvemia cha nu tuo mote. Kepfhekhokelie rhüwate, rüseko rhu mote, thepha dieko se mhaü tuo mote.

⁹ Kijüu kra mu meziete; Lebanon-e puo ziejü di rüwite, Sharon-e kijükesia tuoite; tsiu Bashan mu Karmel seiboko nyü piete.

¹⁰ “Tsie a sietuo,” Jihovae siya, “A tsie a pie kerükrielietuo; tsie a chü pezhalietuo.

¹¹ Nieko shübe nuonipfülie, sidi rügudo penuoya; nieko thesü sünie the pejüwaketuo mi puo zo.

¹² Siro themiako thepie nyokra chükewa, zohu dawa di mi nu thekewa mhietatuo.”

¹³ Nie petse nu ketuoko, a kedipuo chüshü shi, rünyüliecie; mu kepenuora kebako, a kekuo siliecie.

¹⁴ Zion nu kephoumako michiete; Kepenuopfü prei kemoko pekhrukhrute: “U donu supuo mha the pejükecü miu ze balie vi ga? U donu supuo kechachie miü ze balie vi ga?”

¹⁵ Miatho tuoyakecümia, mu dietho puyakecümia, mia pese di mha ngukelieko rütseyakecüu, thesokelie sou nu süu melieyakecümia, thezie kepekru die rünyü mo di nyieto mekalieyakecümia, mu mha kesuo meho nyü mo di mhimielieyakecümia,

¹⁶ sükoe kerükrieko gei batuo; u keyae tsiekrie dahoutuo; ucava pie tsütuo, u dzükrie la nouca jü.

Kedi Kezhau Kijüu

¹⁷ N mhipie kediue puo zivi nu keba ngutuo; uko kijü meya phikecü puo ngutuo.

¹⁸ N noue kemeriekecüu medo n dzükerüchütuo: “Phrüyakecüu kirapuo ba ga? Khezhanuo mesi mejükecüu kirapuo ba ga? Rükhoubako phrüketuou kirapuo ba ga?” itatuo.

¹⁹ Kethesükecüko no ngu sa motatuo, no si kemo die puyakezhako, no puoca si kemo die se kerüchüyakecüko.

²⁰ Zion gei mehoshücie, thenyiko nadiu sü! N mhi-e Jerusalem ngutuo, sei-izei kebachü puo, rhuo kedilie kenjükecü pfheki, puo seizhieko phelie kelho puo, mu puo roko puorei tetalie kelho puo.

²¹ Derei sünu Jihova puo kekuo kezha nunu u la batuo, kerüko kemeya mu rücüko kezhü thechü puo chütuo, sünu routhusei sekecü rou volie kenjü, morei rou kezha puorei volie lho.

²² Jihovae u capiu, Jihovae u kekhayakezhaucü la, Jihovae u kediu, puoe u kelalietuo.

²³ N rou ro-u rünyhute; süko puorei rou codiu khe kemeteipie balie kenjüte, morei rou pfheu kelhapie balie kenjüte. Sitse mha vakelie mu ketakelie kekra kezatuo; phiyhoko zorei mha ketatuo.

²⁴ Sünu miapuorei, “A suo balie,” ilie lho; themia sünu kebako kejo va uko tsütuo.