Isaya 32 - Angami Naga CL (Re-edited) Bible (BSI)

Kemiatho Kedi

¹ Harie, kedimia puoe kemiatho nu dituo, tsiu kedinuokoe kemezhü nu mha kekhatuo.

² Uko kehoupuorei teikhrie nunu rüshükelie chü puo, khriedi nunu u yalieyakezha puo, thechü keso puo nu dzü kenyi rü tuoi, thedzükezei nunu kijü nu tsiekrie khrü puo mhieituo.

³ Sitse mha nguyakecüko mhimietalie lho, mu rünyülieyakecüko mhapfhe silietuo.

⁴ Meyhumehecüko mhale menuotuo, mu die pu kethekecüko meü die pu merhü mu pu mesatatuo.

⁵ Kenyau üse thetseimiaü kie salie lho, mia kepesemia üse therhumia ü sa motatuo.

⁶ Kemelomia kerhanyacü die puya mu uko noue mezhü kemo do rhüya: Ukepenuopfü zho kemo chüketuo la, Jihova dze pu kekrüshüketuo la, kemerüko menguu chü molieketuo la, mu keterhüko bu kekrie selie kelho la.

⁷ Mia kepesemia mharhü pete mia kepese mharhü; ukoe kesuo nunu mha kesuo rhüya, ketsopfhüko mezhü kenyi nhie zorei ketijü die pie kejüu pekawaketuo la.

⁸ Derei u nou kemeyamia mha kevi rhüya, mu mha kemeya nu thashüya.

Jerusalempfüko Bu Menuolienukecü

⁹ Sieliecie, nie thenumia lhou rüü kebako, a pfhe rünyüliecie; nie kedzüluo keba rüünuoko, a diepu rünyüshücie.

¹⁰ Teicie puo zie ba mo di nie kemezhietuo, nie thenu kedzüluokecüko; khube lieyieu suotatuo, mu nhasi lieyieu vor motaketuo la.

¹¹ Pe zoliecie, nie thenumia lhou rüü kebako, nie kedzüluo kebamia, kemezhietuo, nie pfhenei rhuowalie, di methuotalie, sidi gakhropfhe pie nie chie chalie.

¹² Nie merü ketouliecie, lie keviko la, puo yie kevi khube la.

¹³ A themiako kijü nu zohu mu huphienuo bu ketshu chü sierkezhüu la; uwe, noumvü nadiu nu keba thedzükezie ki peteko la.

¹⁴ Kedikiu rükra motaketuo la, nuolhou kekra nadiu nu lhou motatuo; kijükhruu mu rükhouba shadzeu, kechachie khunuo bou chütatuo, nha gadako kenei mu peri kroko tuo chüketa la;

¹⁵ peso geinu ruopfü puo u gei rushü, mu rayhau pie lie kevi chülie, tsiu lie keviu ketsa chülie kemochie.

Ukepenuopfü Kedi mu Noune

¹⁶ Sitse kemezhüu rayha nu lhoutuo, mu kemiatho-u lie kevi nu batuo.

¹⁷ Kemiatho mhatho pete nu vitho, mu kemiatho geinu mhieikecü siro kechachie khrukhrekecütuo.

¹⁸ A themiako menetshüikecü nu lhoutuo, khrukhrecü keba nu, mu mhiei di rüleikelie chü nu lhoutuo.

¹⁹ Ketsa jü tseitatuo, tsiu nadiu bie kerünuo phrewatuo.

²⁰ Nie rücü khie nu tsia vayakecüko, thudo mu gada bu, u medo chü rühouyakecüko, thejakepfütho.