Isaya 31 - Angami Naga CL (Re-edited) Bible (BSI)

Jerusalem Yalieketuo

¹ Kekhruohi la Ijipt nu ketsuko we ce, chülietie, mu kier pelekebako, kierbagei krakecü la tsiu kierkeseko kuo phi üdi pele kebako, derei Israel la Kemesau meho mo, morei sanyü kemoko we ce, chülietie!

² Sirei puo rei mhasi di kepeka se vorya; puoe puo dieko rhü laya mo, derei kesuo kechü kinuko gei sietuo, mu kephouma kechü nu kekhruohiko petsoutuo.

³ Ijiptko sü themia zo, mu Ukepenuopfü mo; uko kierko sü chüüphou zo, mu ruopfü mo. Jihovae puo dzie yhakeshü ki, mia kekhruohiu puo phi mesütuo, mu mia bu puo kekhruohiu rei katatuo, sidi uko pete keze tetsutatuo.

⁴ Jihovae a ki pucü, losha puo morei loshanuo yopuo puo chüte cütuo üdi nge ba, mu kuopfhemia kroko kieshü rei, uko melieshü zorei michie mo morei uko pfhe la merota kemo tuoi, krodiko Jihovae tsur di Zion Kijüthou mu puo kijükhru geinu kegeituo.

⁵ Pera pruo ketuo tuoi, krodiko Jihovae Jerusalem yalietuo; puoe süu yalie mu shüphralietuo, puoe süu lhieshü mu kelashütuo.

⁶ He-i Israelmiako, nieko puo petsouthor tuoketau ki rürei la vorliecie.

⁷ Sünhie nie thuo nie la nie dzie pie phouma di chükelie rakachü mu suna miarhiko kelhouwatuo.

⁸ “Sitse Asiriamia themia geinu mo di zhiecha geinu tetsutuo; tsiu themia vie kemo zhiechae puo pekawatuo; sidi puoe zhiecha nunu tatuo, tsiu puo khriesako kemvü chüpie mhachütuo.

⁹ Puo badiu michie di jütatuo, mu puo kezhako michie di pfhelhau va di tatuo,” Jihova puo mi Zion nu kebau, mu puo miphu Jerusalem nu kebaue siya.