Isaya 30 - Angami Naga CL (Re-edited) Bible (BSI)

Ijipt gei Kemerüu Kemethuo Chüketa

¹ He-i, mia petsou keba nuonuoko, idi Jihovae puya, ukoe thedo rhü baya, derei a do zeya mo; uko kekhrietho, derei a medo-u petsou di ya, sidi kephouma pie kephouma baya.

² Ukoe a medo rüsa mo di Ijipt nu tsu, Faro bu uko keya chütuoü, Ijipt khrükhro rüzhütuo üdi.

³ Süla Faro zhawheu nie la thenga chütatuo, mu Ijipt khrükhro rüzhükecüu nie kengakecü puo chütatuo.

⁴ Puo kezhako thuo Zoan nu ba mu puo dielieko thuo Hanes tsolieta zorei,

⁵ kehoupuorei thenga chüta zotuo, uko la mha kemevi chüshülie kelho kro puo geinu, kemenga mu thenga sie kekhruohi morei kemevi se vorlie kelho kro puokecü la.

⁶ Negeb nhachüko dze pukeshü die, ukoe kinyi pie gadako chie geinu pfü, mu ukoe kinyi pie utko chiethou geinu se loshakrü mu meho keba loshachü, priele siro kepruo nyhüpfü, kelhou kijü kemezhiekecü mu kezie kijü pfüthe di kemevi chüshülie kelho themia kro puo ki vo.

⁷ Ijipt kekhruohi sü puoma jü mu kemethuo, süla ae puo ki, “Rahab tsesei kebapfü,” si.

Petsou kesier Themia Kro Puo

⁸ Tsie vo di tsiesie vorketuo teiu la kechachie zhapu puo chülieketuo la, uko mhodzü nunu tsiekra puo gei thushülie, mu pie leshüda puo nu thushülie.

⁹ Ukoe mia kepetsou kro puokecü la, kecürü nuonuo, Jihova kepethadie rünyü nyü kemo nuonuo;

¹⁰ siedzekenguko ki, “Ngu hie,” si; siedzekesiko üse, “Hie ki siedzedie puotouu pu hiecie; hie ki rünyü kevi die pulie, mha kese siedzekesi dieko pulie,

¹¹ chau khawalie, chau nunu puo tseitsa pralie, hieko bu Israel Kemesau dze rünyü sa hie,” situo.

¹² Süla Israel Kemesaue puya: Kekreilamonyü niekoe a dieu khawa, di mia kepese tsiu ketsügeikecü pele mu süko khremerüte;

¹³ Süla kejo hau nie la tsiepfhe kerükrie puo rükota di, bvü par mu tetsuta nyünuo ba di vapuochü meketa mhietuo;

¹⁴ Siro süu keme litho-u li kepro mhie, vaphrobawa di puo tsoko donu miyiekhou chülie kevi yopuo, morei dzübou nu pie dzü thoulie kevi yopuorei ngulie motatuo.

¹⁵ Niepuu Jihova, Israel Kemesaue puya: Rüreikelie mu rüleikelie nu nie kelalietuo; sei-izei keba mu kepele pie nie kekuou chütuo. Derei nie mvüte,

¹⁶ di sie, “Mo! hie kier geinu tatatuo,” si. Süla nie bu tatuo! mu “Hie kier ta kevi gei batuo,” si. Süla nie kewhuoko bu rei ta vituo!

¹⁷ Mia puo mia kechükeshü la mia nyie puo tatatuo, mia pengou nie kechükeshü nu nie tatuo, nie khapie kijüthou mezü puo gei pfhelhasei puo mhiei, kijüthou puo gei zasi puo kemhie bawa kemochie.

Ukepenuopfü Phrapie Zion ki Keshü

¹⁸ Süla Jihovae nie gei tseiüvishütuo üdi pfhe ba; süla puoe sietatuo, ngukemezhie pie nie kieshütuo üdi. Jihova sü mezhükecü Kepenuopfü puo zocü la; puo khremerü keba pete thejakepfümia zo.

¹⁹ Ketho zo, he-i Zion nu themiako, Jerusalem nu kelhouko, nie kra salie lho. Nie meliekeshü pfheu nu puoe nie ngumezhie tou zotuo; puoe süu sikeshü ki puoe nie die kelashütuo.

²⁰ Niepuu thuo ketsopfhü niekhrüda mu kemezhiekecü dzüu pie nie tsü zorei, nie Kepethau puo thuo puo kevie sa motatuo, derei nie mhi-e nie Kepethau ngutuo.

²¹ Siro nie rürei thezatsa morei thevitsa vaketa ki, nie nyie-e nie sietsa nu “Chau hau ho, hanu tuolie,” isi di kepu die puo situo.

²² Sitse nie rakachü dzü pie zekecü terhuorhiko mu suna dzü pie thekecü terhuorhiko perhuwatuo. Noe süko pie mha mesa kemo üdi kelhouwatuo; noe uko ki, “Nie tuotalie!” situo.

²³ Siro noe pie kijü nu prukeshü tsiau la puoe teirü khashütuo, mu kijüu geinu ngukelie telha, vi mu krapie n ketshukelhuo chütuo. Sünhie nie kiri-e puotuo razhako nu nha cütuo;

²⁴ mu ze liecieyakezha thudoko mu gadako bu nyopfhükhou mu charuo se chü kemesakewa tshüdi nu kezhü nha cütuo.

²⁵ Siro mia dukhri sekecü nhie, dahou kerükrieko teketsu ki kijüthou kerükrie pete gei mu kijükhru pete gei rücü dzü krutuo.

²⁶ Jihovae puo themiako kechüpfüko phakeshü nhie mu puo dzie biekewa rüzako chü kemenekeshü nhie khrüu kezie niaki kezie tuoitatuo, mu niaki kezie puo kezie de thenietatuo.

Ketsokecü pie Asiria gei Keshü

²⁷ Harie, Jihova zau sü kepetse nunu vorzhie, puo nouyie tu di khurüdzi; puo nei kemo bu puotie tshu, mu puo meüe mha thewayakezha mi mhie di;

²⁸ puo thesüue kerü dzüdi sier u vo vakecü mhietuo, kepeka thouzo pie seyieko rüzotuo, mu themiako meco phalie di teshü u medo chü cha kemonu votuo üdi.

²⁹ Kemesa nyi puo nyikecü tuoi nie-e theva gei tsali puo chütuo; mu mia Jihova kijüthouu gei, Israel Tsiekrieu gei khotuo üdi luoü khoukezhü mhiei nie nou nie neituo.

³⁰ Siro Jihovae puo pfhe kemesüu pie pesishütuo mu puo nouyie mu mha the pejükecü miü puo geinu teikhrie khriedi mu prükekrü sa di puo bou mia vü tsurkecüu pengushütuo.

³¹ Puoe puo seiro pie mia vükeshü ki, Asiriakoe Jihova pfhe si di michie kemerie chütuo.

³² Siro Jihova kepechü theu pie puo gei keshü ki übou mu harp khou satuo; puo bou kege di puo uko ze kegeituo.

³³ Thiedzütho nu kethe chü puo chüpie zhüwatakecü la, uwe, kediu la dojüpie bawate; kethe seipfhe süu shü mu meya, mi mu sei kekra sa; Jihova thesü thuo mitsie rü puo tuoi süu petushüya.