Isaya 3 - Angami Naga CL (Re-edited) Bible (BSI)

¹ Kekreilamonyü Kediu, Krodiko Jihova, Jerusalem mu Juda ki nu puo mvü dze kemetei se ketha, mu puo kekhrüko pete setazhie, kecücabo pete, mu dzübo pete.

² Terhümiaviu mu chüpahiu, capiu mu siedzekesiu, thuophiu mu phichüu,

³ mia hiepengoumhokezha mu therhu themia, mharhükesi mu meduokesi siro theguo dze kesi chüsetazhie.

⁴ Sidi a thepfunuomiako bu u kedinuomia chütuo, mu nuoranuomiako bu uko mho dituo.

⁵ Mia bu uko pesetuo, mu mia puoe kekreimia puo bu puo pesetuo; mu u zanuou bu u pesetuo; khriesamia phichümia gei kemharhütuo, mu miado-u therhumiau gei kotuo.

⁶ Mia puoe puo kinumia, puo thinuomia puo zorei telie di sie, “No n pfhenei nyi; n bu úko krüta chütuo, mu mha pekakewa hako pete pie n khroshütuo,” situo.

⁷ Derei sünhie kekreiue shie di sie, “A mia chü keshürhokezhau chülie kenjü, a a kitiekinu niekhrüda mu pfhemenei rei jü; nieko bu a pie themiako krüta chülie lho,” situo.

⁸ Jerusalem-e kate mu Juda tetsuketa la, kekreilamonyü uko diepu mu uko mhathoko Jihova petsou di uko ze keba puo zayieu perhuwate.

⁹ U zie kenguu thuo u kejo thashüya; sükoe Sodom mhiei u kephouma rükhruoya. Sükoe süu kevieya mo, süko we kesuokerhu! Kekreilamonyü u thuo u gei kesuo se vor.

¹⁰ Kemezhüko we kedipfü rei ruokuo shi, ukoe u mhathoko siu cü zotie eru.

¹¹ Kerüzhüu gei kesuokerhu! Kidepuo uko ruosuo shi, uko dzie pie chükeshüu uko gei chü la zotuo.

¹² A themiako, nhicumia bu uko pese, mu thenumiako bu uko mho di. He-i a themiako, nie krütakoe nie cha tha kekrüya, mu nie chako bie kebouwaya.

¹³ Jihovae puo nyieu putuoü thate, puoe themiako capi chütuoü thate.

¹⁴ Jihovae puo themia phichüko mu kedinuoko zelie di dienyakecütuoü lete: Khubelieu cükelieko sü nieko ze; kejüko vie ketakelieko nieko kinu ba.

¹⁵ Nieko a themiako getshiekeshü mu kejümia zieko gekeshü kedipuo ca la ga? idi Jihova krodiko Kepenuopfüe puya.

¹⁶ Jihovae sie: Zion nuopfüko kerüzhacü la, u vo petopie tuoya, uko mhi lala di mha meho, u chatuo mia rünyü kemo chatuo, uko phi thetsei kekreikrei tuoya;

¹⁷ Jihovae Zion nuopfüko tsüle gei kechüpfü puo pie pechüshütuo, mu Jihovae uko kemengako hieshütuo.

¹⁸ Sünhie Jihovae uko rütsonyako; uko phikhako, u tsügei keshüko, mu khrükia mhiko;

¹⁹ keliekecüko, kethuoko, vozipfheko,

²⁰ u tsügei rütsoko, u thuoko, vatshiko, mhare kevi bouko, mu theguobouko,

²¹ zasi dziekhako, nyhükhako,

²² thenyi pfheko, pfhe kerütshupfüko, u kewhe pfheneiko mu likhuoko;

²³ pfhenei keviko, linen pfheneiko, tsüzeko, mu u ziekeya pfheko setatuo.

²⁴ Puore kevi sou nu menakecü batuo; chiepha sou nu kero; u tsütha kevi sou nu tsüpie batuo; mu puoma kere pfhedzie sou nu gakhropfhe chiecha; zivi sou nu thenga batuo.

²⁵ Thepfumiako zhiecha geinu tetsutuo, mu nie terhümiaviko rüyachü nunu tetsutuo.

²⁶ Mu süpfü kharuko nu thekrü chü mu kratuo, puo menyümenouwa di, puo bu tsu kijü batatuo.