Isaya 29 - Angami Naga CL (Re-edited) Bible (BSI)

Jerusalem Whuokecü

¹ He-i, Ariel, Ariel, David-e razhü kechü rünau! Teicie pie teicie bashülie; thenyiko bu uko teiki ba zolie.

² Sizorei a we Ariel bu kemezhielietuo, mu sünu meheimelo tsiu thekrü chütuo, siro Jerusalem-e a la Ariel puo tuoitatuo.

³ Siro ae David tuoi razhüchü chüpie n petsoutuo; ae dahou kerükrieko chüpie n retuo, mu a n petsou ketuo la kuda pfhetuo.

⁴ Sitse kijü kesou nunu noe die putuo, mu rünuotsu nyophe nunu n dieko partuo; mu kijü khronu n pfhe-e temi pfhe tuoi partuo, mu n diepuu nyophe nunu pesikhuoi partuo.

⁵ Derei n ngumvümia we krodi chü nyophe kememhie tuoituo, mu mha rünyü kemo krodiko shübe kepruo tuoituo. Süue va puo nu mhai zo di,

⁶ Krodiko Jihovae n ki vortuo, teikese siro kiükishü mu mhapfhe kere se sa di khriewhi, khriedi mu mha the kepejü mi se di.

⁷ Siro Ariel perhiekecü seyie pete krodiko puo kepetsou pete, puo dahouko mu puo keyhukecü pete-e u mho puo tuoi, theva gei ziemho puo tuoi zotuo.

⁸ Merü ketuomia puoe puo mho geinu mhacü ba, mu cosier derei merü ba zo, morei keterhümia puoe, puo mho geinu dzükrie zhü, tsiu phisia mu terhüzhü zo di co kesier ki, terhü ba zotuo, Zion kijüthouu perhiekecü seyie pete krodiko rei sümhie zotuo.

⁹ Nie thuo nie chü kethenya pie thenya balie, nie thuo nie mhi chü peciewa di nie mhicie bacie! Meze bacie, derei zu nunu hie; pevüvü bacie, derei zu kekuo nunu hie.

¹⁰ Jihovae ze pesoukecü ruopfü rupie nieko gei shü; puoe nie mhiko bie kemawa, nie siedzekesiko khawa, mu nie tsüko, siedzekenguko whewatakecü la.

¹¹ Siro ziemho hako pete nie la khatsawaketa leshüda puo nu die tuoite. Süu khapie leshüphrü kesimia tsü di sie, “Hau phrüshüyi,” ishü ro ukoe sie, “Hie phrülie kenjü, hau nyhütsawaketa la,” si.

¹² Siro mhanuü süu khapie leshüphrülie kelhomia tsü di sie, “Hau phrüshüyi,” ishü ro ukoe sie, “Hie hau phrü si mo,” ita.

¹³ Jihovae sie: Themia hako u tie nu a penuo vorya, mu uko tiepie a rhuya, derei uko nou we a kinu pecie phi, mu uko a rüsuokecü sü pemo seketuo themia die kro puo zo.

¹⁴ Süla a themia hako pie mha u ngokecü chü lashütuo, kemeriekecü mu u ngokecü. Uko kesimiako mhasi kaüjütatuo, mu uko kelemiako mhale keviewatuo.

¹⁵ Yha! Jihova la nie mharhü kevie pesouthoryakecüko, u mhatho kezei nu kebako, mu sie, “Supuonie u ngu ta? supuonie u si ta?” ikebako.

¹⁶ Nieko mhanya bie pekhepelawaya! Litho-u üse linyo-u ütuo me? Chükelie nyau puo chükeshü üse, “Puo a chüshü mo” situo me? morei mharhiue puo rhikeshüu üse, “Puo kesikele puorei tuo mo,” ituo me?

Israel Rhakelie

¹⁷ Lebanon-e liekrokecü puo chüta, mu liekrokecüu pie ketsa puo chütaketuo puotei cha mota mo me?

¹⁸ Sünhie nyievüko leshütshüu nu dieko rünyütuo, mu mhiciemia rei merü mu zeikecü nunu mha ngutuo.

¹⁹ U zho kemenekoe Jihova geinu u kenei kesa ngulietuo, mu ketsopfhümia rei Israel Kemesau geinu u nei phituo.

²⁰ Mha rünyükemo-u ba sa motatuo, mu mha krekenyüu tuo motatuo, tsiu mha kesuo chütuo üdi rü keba pete dathewatuo.

²¹ Mia mezhü kewhi pejükezhamia, thecamia la kebie pethoukezhako, tsiu kemethuo nu kemezhümia mezhü pejükezhamia rei.

²² Süla Abraham rhakeshü Jihovae Jakob kinumia dze pukecü; Jakob thenga chü salie lho, puo zie bu cacütalie lhote.

²³ Puoe puo nuonuoko mehokesie ki, puo donu a dzie mhathoko kenguki, ukoe a za chü kemesatuo; ukoe Jakob la Kemesau chü kemesatuo, mu Israel Kepenuopfü khrüprei nu thatuo.

²⁴ Siro ruopfü nu kekrüketako mhale lalietuo, mu panya kebakoe kepetha die lielietuo.