Isaya 28 - Angami Naga CL (Re-edited) Bible (BSI)

Efraim Bu Menuolienukecü

¹ Yha, Efraim kemezeko kemiakokecü cüu, mu puo zivi zapuzayie ratakezhü nyiepouu, mhakenyi ca cüpie luotshüpfü mu zu bu u penyükewako tsü gei kebau!

² Harie, Jihova gei kezha mu kekuo ba; prü krü kemerie chü kevor-u mu mha bie kepesuo teikhrie tuoi, khriedi kere, dzüdi rüsou kijü nu ketsur tuoi, puo dzie se uko kelhoupie kijü shüwatuo.

³ Efraim kemezeko kemiakokecü cüu, mia phi khronu kedewatuo;

⁴ Siro zivi zapuzayie chü di ratakezhü nyiepouu; mhakenyi ca cüpie luotshüpfü kebau tsü gei, teile mhodzü chiedesi me kerie puo tuoi zotuo; kehoupuorei süu ngu ro, puo dzie nu ler mumetha cülieya.

⁵ Sünhie krodiko Jihovae puo themia lhiepie kebako la, zapuzayie tsüre, mu kezivi keditsüre chütuo;

⁶ tsiu puoe mia capi chütuoü kebau la kemezhü ruopfü khashütuo, mu kharu nu terhümia whuo ketsiesiekewau la kekuo chütuo.

⁷ Hako zorei zu la melu, mu zu kekuo la pevüvütaya; zievo-u mu siedzekesiu zu kekuo la melu, uko zu la kebou bate, uko zu kekuo la pevüvü bate; uko ziemho nu rei kekrü bate, theca khakeshü nu rei uko phi mesüliete.

⁸ Merü rhuthorkecü pie mizhü pete tshu; mharapuorei mesa mote.

⁹ “Puoe mhasi pie supuo petha ta? Mu dielie cau pupie supuo kie ta? Nudzü nunu khokeshüko, u zuonuo nu nunu piekelieko tuo me?

¹⁰ Kekreilamonyü thathadie mho thathadie, thathadie mho thathadie, puocha mho puocha, puocha mho puocha, haki huoyo, luki huoyo,” isi.

¹¹ Ketho zo, u meü meduo, mu u die kreikecü kro puo geinu puoe themia hako ki die putuo,

¹² puoe uko ki hamhiecü pushü, “Kerülei sü haha; kerülei pie kemezieko tsücie; mu rüleikelie sü haha,” si. Sirei ukoe rünyü mvüte.

¹³ Süla Jihova die uko ki vorkecü, “Thathadie, mho thathadie, thathadie mho thathadie, puocha mho puocha, puocha mho puocha, haki huoyo, luki huoyo,” si; uko bu vo di tsiesie lata, di prota, mu uko malie di telieketuo la.

¹⁴ Süla Jihova pfhe rünyüliecie, nie mha kre kenyüko, Jerusalemmia mho di kebako.

¹⁵ Kekreilamoü nieko pukecü, “Hie kesia ze dietseidiekho chüwate, mu Sheol ze kepfhekhowate; kepechü mha vu pejü zokecüu kevor ki, süu hie gei vorlie lho; hie kecürü pie hie keya chülie, mu ketijü nu hie rüshüliete,” si.

¹⁶ Süla Niepuu Jihovae puya. Harie, ae Zion nu ketsie mvüdze puo, ketsie kevi puo, puoke nu tsie puoma kere puo, mvüdze ketho puo seshüzhie. “Puo pelekelieu vapethowalie lho.”

¹⁷ Siro ae kemezhüu pie kemejüro-u chü; mu kemiatho-u pie khe kerülokecüu chütuo; prü bu kecürü pie kechü keyau vawatuo, mu dzü bu sier rüzhükelie chü vuwatuo.

¹⁸ Sitse kesia ze dietseidiekhokelie pejüwatuo, mu Sheol ze kepfhekhokelieu thalie motatuo; kepechü mha vu pejü zokecüu kevor ki puo bu nie kedewatuo.

¹⁹ Puo kevor metsei, puoe nie telietuo; puoe teisoduü vortuo, khinhie rei theva rei; mu diecau lelieketuo mha kemerie zotuo.

²⁰ Thezhüu dzüthor di mia puoe puo petoshülie kenjü; tsiu upfheu pie puo keziketuo la cüthor.

²¹ Jihovae Perazim Kijüthou gei kesie tuoi sietuo, puoe Gibeon razhau nu tuoi puo nou meyietuo; puo mhatho-u chüketuo la, puo mhatho-u kethekhrü! mu puo chüketuou chüketuo la, puo chüketuou puorhi krei!

²² Süla tsie mha krenyü hiecie, moro nie phako chü kemeteiwa rei si lhomu; a Jihova krodiko Kepenuopfüe kijü peteu gei kepeka die khakeshü sicü la.

²³ Rünyülie, a pfhe rünyüshücie: Rünyü toulie, di a diepu silie.

²⁴ Tsia cietuo üdi liephie kethako phie sei zo thaya me? uko kijü hie sei mu rü sei thaya me?

²⁵ Ukoe kijüu tsia khashü mu jira tsia prushüya me? Mu thoulha puocha chü di khashü, barli pie puo thuo puo ba nu shü, siro nhalha pie nhaphietsa shüya mo me?

²⁶ Uko Kepenuopfüe mha pupie kie toushüte, mu uko pethashüyie ru.

²⁷ Mia kejü kezha pie jirabo vüya mo, morei bageithuo ketoupie jira si gei shüya mo; derei seita pie jirabo vürieya, mu sei puo pie gakrasi vürieya.

²⁸ Niekhrüda la telha getshieya, derei puo süu getshie sei zo baya mo, mia puoe bageithuo mu kier bu süu gei pfüya derei süu getshie bawaya mo.

²⁹ Hau rei krodiko Jihova kinu vor; puo ketarhokeshüu u ngo zo, mu puo mhasi vithor zo.