Isaya 27 - Angami Naga CL (Re-edited) Bible (BSI)

Israel Kelakelie mu Kie Kengukelie

¹ Sünhie Jihovae puo zhiecha khriekecü, kezha mu kemeteiu pie ta kevi tinyhüu Leviathan, rüwirügekecü tinyhü Leviathan petseishütuo, mu puoe dzükezha nu keba kesüdiu dukhriwatuo.

² Sünhie: U noukemvü khubelie puo dze kelilie!

³ A, Jihova, puo kepfheu, ae dzü pie puo va sei baya. Mia bu puo pesuowa molieketuo la, a theva khinhie puo pfhe baya.

⁴ Ae noupfhü jü. Mhanuü zohu mu huphienuoko pie a tsü ürei, ae sie uko ze kebietuo, a uko thewatuo.

⁵ Moro uko bu a keyau lielie uko bu a ze vitho chüwalie, uko bu a ze vitho chüwalie.

⁶ Vorketuo teisozhako nu Jakob puomie krelietuo, Israel-e puo pou poulie mu puonuo thelietuo, sidi puosi vüpie kijü pete tshulietuo.

⁷ Puoe uko vükhrükeshüko vükeshü tuoi, uko vükhrüshü me? Morei uko kedukhriko dukhrikewa tuoi uko dukhriwa me?

⁸ Nie whuokewa, miadie chüketa pie uko mese kechü zo; niathutsa teikhrieu kevor nhie puoe puo teikhrie kereu pie uko he petawa.

⁹ Süla hau pie Jakob kejo-u bie pejüwatuo, mu hauha puo kephouma vakeshü puo siteuta zotuo; puoe ruosuoba gei ketsieko pie nyokra getshiekewa tuoiwa ro, Asherako morei dhuna ruosuobako puorei ba motatuo.

¹⁰ Dahou nadiu thedzükezei chü, rüna vawaketa mu khawaketa puo, rayha tuoite eru; sünu mithunuo nhaliecü, sünu zhü mu puo coko thecütuo.

¹¹ Puo coko siata ro, süko tsetaya; thenupfüko vor di süko pie mi chüwaya. Themia hakoha kesikele kejü kro puo eru; süla uko chükeshüu uko ngumezhielie lho; uko rhikeshüu uko gei noulie thashülie lho.

¹² Sünhie Eufrat rü nunu vo Ijipt rücüu ketso Jihovae telhako nyütuo, Israelmiako, nieko puopuo di pfhü kengutuo.

¹³ Mu sünhie ketsü kezha puo khoushütuo, sidi Asiria kijü nu jüketako mu Ijipt kijü nu whuokewako vor di Jerusalem kijüthou kemesau geinu Jihova rüsuotuo.