Isaya 26 - Angami Naga CL (Re-edited) Bible (BSI)

Juda Kuokelie Tsali

¹ Sünhie Juda kijü nu tsali hau chütuo: Hie nadiko kekuo puo ba; puoe kuokelieu pesiepie sozha mu dahou kemhieishüya.

² Kharuko khrüshülie, kemiatho seyie dietho bakelieu bu lelieketuo la,

³ u nou pie n gei kebamia, noe u bu tseicü noune nu baya, ue n peleyacü la.

⁴ Kechachie Jihova pele tuolie, Niepuu Jihovae kechachie tsiekrieu zocü la.

⁵ Puoe kerükrie gei lhou kebako, nadi kerükrieu nu kebako pie kerünuo nu kewate. Puoe puo pie ke kijü shüwate, puo kelhoupie nyophe nu shüwaya.

⁶ Themia phi puo kedewa, kejümia phi, ketsopfhümia phichako.

⁷ Kemiathomia cha we mezhü; He-i kemezhüu, noe kemiathomia cha bie kemejushüya.

⁸ He-i Jihova, n capi chako nu, hie n pfhe ba, n za mu n kerükrau sü hie ruopfü kemenguu zo.

⁹ A ruopfüe theva gei n menguya, a nou ruopfüu n pfhü kelho ba. N capiko kijü nu keba ki, kijü nu kelhoukoe kemiatho silieya.

¹⁰ Mhanuü kerüzhümia khrieshü ro, ukoe kemiatho silieya mo, kemezhümia kijü nu uko rüpfhi, mu Jihova kezha ngu lho.

¹¹ He-i Jihova, n dzieu yhapie bate, derei uko süu ngu mo. N themiako la uko bu n shürheiu ngushü, di mengatacie. N ngumvüko miu bu uko the pejüwacie.

¹² He-i Jihova, no hie la nouneu keseshütuo, hie mhachükelie pete, no hie la chü phreshüwate.

¹³ He-i Jihova hie Kepenuopfü, no kemo niepu kekrei hie mho diwate, derei hie n za rübei pevielie.

¹⁴ Kesiamia rheilie lho; mhakhrüe lasielieya mo, noe uko pechüshü di uko pekawa, mu uko kerükra pete vawacü la.

¹⁵ Derei noe seyieu chü pekrashü, he-i Jihova, noe seyieu pekrushü; n chü pezhashüte; noe kijü rie pete bie kemeyaliete.

¹⁶ He-i Jihova, kemezhielie tse ukoe n pfhü, no uko pechü di pethakeshü ki ukoe kecha chülie.

¹⁷ Thenumia nuoze tei penuota ro, puo kechü pfü ruorüi mu meyhumezhiekezhü tuoi, hie rei n la sümhieita zo, he-i Jihova,

¹⁸ hie rei nuonipfü, hie meyhumezhie, derei hie teikhrie penuokeshü zo. Hie kijü nu mhapuo nu rei kuolie mo, mu kijü nu lhou baketuo la miapuorei penuolie mo.

¹⁹ N kesiako rheilietuo, uko moko sielietuo. He-i nyophe nu kebako, colie, mu nie kenei la keliliecie! N thezeie kezie thezei puo zo, mu kijüu hadzü nu siaketako pelhou lashüketuo la.

²⁰ Vorlie, a themiako, nie bouko nu lelie, sidi nie sietsa kikhako khawalie; noupfhüu bu rükreta kemochie, puotei keduoyo la nie thuo nie kevielie.

²¹ Kekreilamoü, Jihova puo chü nunu parzhie, kijü themiako kerüzhü la uko pechütuo üdi, mu kijüue puo gei thezie pekrukeshüko pie mia kieshütuo, di puo geiwaketako whe sa motatuo.