Isaya 24 - Angami Naga CL (Re-edited) Bible (BSI)

Jihova Ketsokecü Pie Kijüu gei Keshü

¹ Tsie Jihovae kijüu pekawatuoü siro süu biepie thedzükezei chüwatuo üzhie, mu puoe süu pesurhuwatuo mu sünu lhou kebako biepie kecürewatuo.

² Siro themiako gei tuoi, zievomia gei rei tuo; mia dieu gei keshü tuoi, puo niepuu gei rei tuo; kituopfü gei keshü tuoi puo niepupfü gei rei tuo; kekhrüu gei tuoi, kezeu gei rei tuo; mia kethepuu gei tuoi thepukelieu gei rei tuo; mia bu u pu kepfüu gei tuoi, mia pu kepfüu gei rei tuo.

³ Kijü bie peka tseiwatuo mu pesuo lotsowatuo; Jihovae die hau pushüwatacü la.

⁴ Kijüu so mu rüwitatuo, kijüue mezie mu rüwitatuo, teiko rei kijüu ze mezietatuo,

⁵ Kijüu puo gei lhou kebako khronu puo perhu pfüzhüte; ukoe thezhoko vacie, rhükelie zhoko varhuo, di telhekechachie diekho-u varhuowa.

⁶ Süla rüse-e kijüu mezulie, mu sünu lhou kebako u kejo la kemezhielie; süla kijü nu kelhouko tsakuota, di mia huoyo rübei lhiekeshü zo.

⁷ Khubezuu sote, khubebo-u meziete, thenou kenei pete meheimelo bate.

⁸ Timbrelko pfhe u keneiu bie zeiwate, u kenei pfhephrau jüte, lyre kenei pfheu bie zeiwate.

⁹ Khubezu krie di thepfhe chükecüu sa mote; khubezu keviu rei kekriemia me nu pfhüte.

¹⁰ Kebvükecü nadiu bierhuowate, ki pete khawa di mia puo bu rei lelie kenjüte.

¹¹ Chaüko nu khubezu kejü la melie tuote; u kenei pete jüte; kijüu kenei whuowate.

¹² Thedzükezei thuo nadiu ketshu chüte, puo kharuko bietshebietshawate.

¹³ Kijü nu mu seyieko donu hamhie zotuokecü la, Olivbo puosi vüriekecü ki mhie, khubesi rielieta di puo siepfhükecü mhiei.

¹⁴ Ukoe uko pfhe chü, uko nei di keliya; uko niakratsa nu Jihova kekuo kezha pu keliyie.

¹⁵ Süla niathutsa nu therhupie Jihova tsücie; dzükezha khieko nunu thetshe pie Israelko Kepenuopfü Jihova zau tsücie.

¹⁶ Kijü kela nunu we ketshe tsali siya, Kemiatho-u kerhu tsali siya. Derei ae sie, a meziete, a meziete. A sü hieshiehieruo! Kecürümia cürü di mhachü; kecürümia cürüthor di mhachüketa la.

¹⁷ Mha kemerie, mu thekreu, tsiu ciephrieu n gei ba, he-i kijü nu kelhouko!

¹⁸ Kemeriekecü pfhe si di takeshüu thekre nu tetsutuo; mu thekreu nunu li keprau ciephrie nunu puo malietuo. Teigei khirkiko khrüshüte, mu kijüu mvüdzeko rünieketa la.

¹⁹ Kijüue pro babate, kijüu cierha krawate, kijüu keniepie mhapuo chüwate.

²⁰ Kijüu kemezemia puo tuoi pevüvüte, kibenuo yopuo tuoi mele bate; puo kephoumako puo gei mesithorta di puo tetsute, mu la sielie lhote.

²¹ Sünhie teiso Jihovae teigei nu teigei kro-u pechütuo, mu kijü gei kijü kediko pechütuo.

²² Kediemia mhie di uko kengupie thekre nu bawatuo; uko pie kedieki puo nu khawatuo, mu zha kekra sie uko pechütuo.

²³ Sitse khrüu puo ziekejü chütatuo, mu niakiu mengatatuo; Zion kijüthou gei mu Jerusalem nu, krodiko Jihovae kedi chü di puo zayieu pie pehüko pengushüketuo la.