Isaya 23 - Angami Naga CL (Re-edited) Bible (BSI)

Tur Dze Pukeshü

¹ Tur dze pukeshü die. Kraliecie, he-i Tarshish rouko, n dahouu pekawaketa la. Ukoe Kupra nunu kevor ki ukoe süu silie.

² Sei-i mu zeitalie, he-i dzü khie kebako, he-i Sidon nu lhithoko, n dieliekoe dzükezhau cie vote,

³ mu dzü kuo phicü nu tuowate; n khezhanuo sü Shihor nu lha, Nail nu lieyieu; noe seyieko lhitho-u zo.

⁴ Mengaliecie, he-i Sidon, dzükezhaue die pushüte, dzükezha dahouu haishü: “Ae nuonuovachü chü mo, mu nuoze rei mo, ae khriesanuomia theke sier mo, morei rüünuomia rei se sier mo.”

⁵ Dieyieu Ijipt nu vor ro, Tur dze la uko nou kemezhietuo.

⁶ Tarshish tsa pfütalie, kralie, he-i dzü khie kebako!

⁷ Nie nadi pu kerükrie kebau, puobo thiedzütho nu tuoketau, puo phi bu puo pfü vo pecie phi nu shükewau hau me?

⁸ Keditsüre pie mia tsüyakecüu, Tur gei supuonie hau rhüshü ga? Puo lhithoko sü kedinuomia phre, mu puo lhithoko therhu themia phre eru.

⁹ Krodiko Jihovae süu rhüshü, kemiakokecü zapuzayie pete bie perhuwaketuo la, kijü nu therhu pete pie kezhasewaketuo la.

¹⁰ He-i Tarshish rouko, nie thuo nie kijü nu pfülie, rou rüleichü hau ba sa mote.

¹¹ Puoe puo dzie yhapie dzükezhau mhoshüte, puoe kediko shükeniewate; Jihovae Kanan la diekhashüwate, puo badiko pekawaketuo la

¹² Puoe pucü: No n nei salie lhote, he-i Sidon rüü phousepfü mia bu puo pesekezha, sielie, Kupra nu pfülie, sünu rei no kerülei ngulie lho.

¹³ Chaldiako kijüu mehoshücie! Themia hako ho, süue Asiria mo zo. Ukoe Tur pie nhachü ba chüwate. Ukoe dahou kerükrieko khahouliete, uko puo kedikiko bie pesuowa, ukoe puo pekawa.

¹⁴ Kraliecie, he-i Tarshish rouko, nie dahouko pekawaketa la

¹⁵ Sünhie yawinu cie hiethenie la, kedimia puo phouu nu, Tur rükra motatuo, cie hiethenie tseita tse, thethenupfü la tsali tuoi Tur gei vortuo;

¹⁶ Harp chü pielie, nadiu nu pralie, n rükra moketa thethenupfü! Thenou kemvü tsali chülie, tsali kekra chüshülie, n rükra lalieketuo la.

¹⁷ Cie hiethenie tseita ro, Jihovae vo Tur mehotuo, mu puoe puo mhatho nu la votuo, di tei khro kelhou kedi pete ze thethelietuo.

¹⁸ Puo lhitho mu puo mhakra chü kemesapie Jihova ki shütuo; süu kepfe morei kengu rei pie balie lho, derei puo lhitho nunu Jihova mhodzünu kebako la kecüca mu pfhemenei kevi kekra rei khashütuo.