Isaya 22 - Angami Naga CL (Re-edited) Bible (BSI)

Jerusalem Pekawaketuo

¹ Ziemho razhau dze pukeshü die. Nieko pete kedipuo le di kikhru gei sieta mu?

² Nieko melie kekuoko, metoumebe keba nadiu, puo nei keba nadiu. N themia siaketako zhiecha geinu sia mo, morei terhü nu sia mo.

³ Nieko mho diyakezhako pete keze tate; theü se mo di uko teliete. Nieko mia bu nie ngukelie pete teliete, ta petse phi nu vota zorei.

⁴ Süla ae puya: A kitsa meho hie, a bu nousuo mhidzü pekrucie; a kekhriemiako pekakewa la a nou thupeluotuoü hie.

⁵ Kekreilamonyü krodiko Niepuu Jihovae ziemho razhau nu, toutoukecü, kedekecü, mu rübvürübiekecü teisozha puo pie ba, dahouko vümeketuo mu kekhruohi la shiepie kijüthouko pesiketuo teisozha puo.

⁶ Elam kierbageiko mu kier chüpahiko ze di theütsie bou khepfü, siro Kir bu pezhü kewheu hieshü.

⁷ Nie razha nie neithoko sü kierbageiko thuo tshu, mu kier chüpahiko kharuko nu thate.

⁸ Puoe Juda kewheu chüsete. Sünhie noe Ketsa Kiu nu rünyieko meho.

⁹ Mu David nadiu cahou rürhuo phiketa ngushü, mu noe rüzie pekhro-u dzüko kengulie.

¹⁰ Noe Jerusalem kiko phrülie, tsiu dahouu chü kemeteiketuo la kiko rhuowa.

¹¹ Noe rüzie keweu dzü la tsiepfhenie donu dzükhou puo chüshü. Derei noe süu chükeshüu meho mo morei thiedzütho nu süu rhükeshüu sanyü mo.

¹² Sünhie Niepuu krodiko Kepenuopfüe mia bu kra mu thekrü chünu, u tsüthie mu gakhropfhe dzie nu shü;

¹³ derei süu sou nu kenei mu thehe chü, thudo gei siro tekuo dukhri, themuo cü mu zu krie bata. “Úko cü mu krie khe, sodu siatatie eru,” idi.

¹⁴ Krodiko Jihovae puo thuo a nyie nunu puo khapie a pesishü: kejo hau nie se mhodzü va nie tsülie lho zo, Krodiko Niepuu, Jihovae siya.

U Zhazhü Kepfhü Kezhako Pejokeshü

¹⁵ Niepuu, Krodiko Jihovae puya: Vorlie, Shebna, ki kemeho-u ki vo di puo ki pushülie:

¹⁶ No hanu n mezhü kedipuo ba mu? N kicükinumia suomia ba di n thuo n la haki nu mekhru thielie, mu kerükrie geinu mekhru thielie, tsiu tsiekrie geinu n kebachü chülie ga?

¹⁷ Jihovae kuo phi di n kelhou kegewatuo üzhie. Puoe n theze tolietuo,

¹⁸ puo n kewhiwhishü di tsierünuo puo tuoi di n kelhoupie kijü kemeya puo nu shüwatuo, sünu no siatuo, mu n kierbagei keviko sünu zhütatuo, he-i, no n niepuu kiu bie kemengakeshüu!

¹⁹ Ae n mhatho nunu n whuowatuo, mu n tha nunu n teshü se kerwatuo.

²⁰ Sünhie ae Hilkia nuou Eliakim, a thekeu kietuo,

²¹ di n pfheneiko pie puo pedzieshütuo, mu n chiephau pie puo gei phashütuo. Ae n kekuou pie puo dzie nu shüwatuo; siro puoe Jerusalem nu kelhouko mu Juda kiu krü chütuo.

²² Ae David kiu cabi pie puo bouka gei shütuo; puoe khrüshütuo mu miapuorei khalie lho; puo khawatuo mu miapuorei khrülie lho.

²³ Ae gojal puo tuoi puo zhie tsapie mha kemetei puo gei shüwatuo, mu puoe puo puo-nuo kiu la zapuzayie kediba puo chütuo.

²⁴ Sidi ukoe puo puo-nuo kiu mesi pete pie vo puo gei goutuo, puo nuosenuoyie mu nuothe, mhakhou kecükerü kehoupuorei, tehie nunu vo lipfhü ketso rei.

²⁵ Krodiko Jihovae pucü, sünhiesü gojal pie thechü kemetei nu zhiekeshüu rüzoutatuo; mu süu dawa di tetsutatuo, tsiu thepie puo gei kezhau jütatuo, Jihovae pushüketa la.