Isaya 21 - Angami Naga CL (Re-edited) Bible (BSI)

Babilon, Edom mu Arabia Dze Kepu

¹ Dzükezhau rayha dze pukeshü die. Negeb nu khriewhiu rükhrie kevor tuoi, süue kijükesia, kijü kemeriekecü puo nunu vor.

² Ziemho kere puo a pesishüte; mia teshüyakezhaue mia teshü, mu mha kepekaue pekashü. He-i Elam, tuo khocie, he-i Media, khahouliecie; puoe meheimelokecü pete a thuo bie pejüwatuo.

³ Süla a chieca gei kemezhiekecü thuo tshute, kechü thuo a tepieliete, thenumia nuonuovachü tuoi; a nuketsute süla mhapfhe si mote, a a dzükoute süla mha ngu mote.

⁴ A nou rüsürüsate, kemichie thuo a kedewate; teiso pi kepar a pfhe kelho kebau a la pekecü puo chüte.

⁵ Ukoe mizhü keseshü, ukoe pfheko khrashü, ukoe cü, ukoe krie. Sieliecie, kezhako, tier pie pezhüu kenheshülie!

⁶ Niepuue a ki puya: “Volie, rükhoumia puo bu thalie, puo bu ngukecüu pu rükhruoshülie.

⁷ Puoe kierkesemia, mia kenie keze ketuo, gada gei ketuomiako, ut gei ketuomiako kenguki puo bu rünyü menuoselie,” si.

⁸ Sitse rükhouu rükhruoshü: “Rükhouba puo gei a tha, he-i Niepuu, khinhie zhate, mu teizeizha pete rei a rükhoumia chü tha zo.

⁹ Mehoshücie, kierkese mia kenienie di vorzhie!” si. Sitse puoe pu lacü, “Tetsute, Babilon sü tetsute; mu puo rhuo miarhiko pete puoe dutshedutshapie kijü zhüte,” si.

¹⁰ Harie, a nyükewau mu hewaketau, krodiko Jihova, Israel Kepenuopfü kinu sikelieu pie a n pesishüzhie.

¹¹ Duma dze pukeshü die. Mia puoe Seir nu a kie di sie, “Rükhouu, theva kichiepuo ta? Rükhouu, theva kichiepuo ta?” si.

¹² Rükhouue sie: “Teiso-u vorzhie, mu teizeiu rei sa. Mhanuü nie ketso nyü ro, ketsolie; lau la vorlie” si.

¹³ Kijükesia razhau dze kepu die. He-i, Dedanmia rüve kroko, nie rayhau nu razhü chütuo.

¹⁴ He-i Tema kijü nu kebako, dzü se vor keterhüko tsücie, kecüca se vor kitako ze kesecie.

¹⁵ Ukoe zhiechako nunu, zhiecha zupie ketuo nunu, theü gapiekelie nunu, mu terhü kere nunu tatuokecü la.

¹⁶ Niepuue a ki pucü: Teicie puo donu, zhakramia teicie kephrüu medzi di, Kedar kevi pete jütatuo;

¹⁷ mu Kedar terhümiaviko donu theükeseko huoyo rübei peshashütuo; Jihova, Israel Kepenuopfüe pushüketa la.