Isaya 20 - Angami Naga CL (Re-edited) Bible (BSI)

Asiriae Ijipt mu Ethiopia Penyülieketuo

¹ Asiriamia kediu Sargon-e chüpahiko mhokezhatho-u ketseshü di puo bu vor Ashdod perhie di süu lielie.

² Jihovae Amoz nuou Isaya ki pukeshü, “Volie, di n chieca nu gakhropfheu phreiwalie, mu n phi geinu n phikou rhuowalie,” siru puoe sükemhie chülie, di methuo mu phithuo di cha tuo tuota.

³ Sitse Jihovae sie, “A thekeu Isayae Ijipt mu Ethiopia kepetsou zasi puo chüketuo la cie se methuo mu phithuo di tuo.

⁴ Sütuoi Asiriako kediue Ijiptmiako tepie kedie chü di zetatuo mu Ethiopiako whuowatuo, nhicu rei phichü rei, methuo mu phithuo di, tsiu Ijiptmiako bu u thodza whe mo di mengalietuo.

⁵ Sitse ukoe uko kemerü Ethiopia mu uko mholieu Ijipt la uko dzükou mu uko ziekejü chütatuo.

⁶ Sünhie dzükezha khie hatsa kebakoe hakemhie putuo, ‘Harie, we-e u merü kevorko mu Asiria kediu kinu u dzie nunu u kelalieketuo la we kekhruohi pfhü di ta u pfhü kevorko gei haite! Siro we, kikidi talietuo mu?’ ” isituo.