Isaya 2 - Angami Naga CL (Re-edited) Bible (BSI)

Thiesie Vorketuo Ukepenuopfü Kiu

¹ Amoz nuou Isaya Juda mu Jerusalem dze ngukecü die.

² Teisozha kenuotsa Jihova kiu kijüthouu pie kijüthou kerükrietho chütatuo, sidi kijükhruko mho sietatuo; mu seyie pete kru puo vatuo.

³ Themia kekra vor di sie, “Vorlie, úko Jihova kijüthou gei kho khe, Jakob Kepenuopfü kiu nu; puo bu puo zhoko pie u pethashü mu u bu puo chako nu tuolieketuo la,” situo. Kekreilamonyü Zion nunu kepethakecü partuo, mu Jihova dieu Jerusalem nunu partuo.

⁴ Puoe seyieko donu capi chütuo, mu themia kekra nyie pepituo; siro ukoe uko zhiechako ketsapie kejü chüwatuo, mu rüngouko ketsapie charuo chüwatuo; seyie puoe zhiecha pie seyie kekrei petsou sa motatuo, morei ukoe terhü do chü salie lho.

Kemiako Kebako Ketsoketuo

⁵ He-i Jakob kiu, vorlie, uko Jihova kezieu nu tuo vo khe!

⁶ Niekoe nie themia chako khawate, he-i Jakob kiu, ukoe niathutsa nu kevor thuophimia mu Filistinko kemhie themoumia bu uko ketshu chü, mu chazoumia ze kedziesete.

⁷ Süko kijü suna mu rakachü thuo tshu, mu süko kinyi puo thela jü, süko kijü sü kier thuo tshu, mu süko kierbageiko puo thela jü.

⁸ Süko kijü sü terhuorhiko thuo tshu, süko nuketsu u dzie pie chükelie, u dziekinuo thuo chükelieko rüsuoya.

⁹ Süla themia bie kerünuo, mu themia pete rei bie pekewate, süko kejo va hie!

¹⁰ Tsiekrieu nu lelie, mu nyophe nu rüshülie, Jihova noupfhüu nunu, mu puo kedi zapuzayie kechüu nunu.

¹¹ Themia rükriekra ketuo mhiko bie kerünuowatuo, mu kerüzha ketuo kehoupuorei bie pekewatuo. Mu sünhie Jihova rübei thuo rükrielietuo.

¹² Kemiako mu zhaketuo peteko, u pie pekho mu rükrie ketuo peteko petsouketuo la, krodiko Jihova teisozha puo ba;

¹³ Lebanon nu sedarbo pete, zha mu rükrie kebako; mu Bashan phriebo pete petsouketuo la,

¹⁴ Kijüthou kerükrie pete, mu kijükhru kezha pete petsouketuo la;

¹⁵ dahou kerükrie pete, mu kuda houpie keba pete petsouketuo la;

¹⁶ Tarshish nu rou pete, mu mhatho kezivi pete petsouketuo la teisozha puo.

¹⁷ Sidi rükriekra ketuomia bie kerünuowatuo, mu kerüzha ketuo kehoupuorei teshü kerünuowatuo, mu sünhie Jihova rübei pie kerükrieshütuo.

¹⁸ Sidi terhuorhiko jü phretatuo.

¹⁹ Jihova kepreiu nu mu puo kedi zapuzayie nunu rüshülieketuo la, tsiepfüko nu mu kijü khehoko nu leliecie; puoe kijüu kechüshütuoü kesie ki.

²⁰ Sünhie themiakoe rakachü mu suna mharhiko, rüsuotuoü u thuo u la chükelieko, kelhoupie soco mu haho tsüwa di.

²¹ Jihova kepreiu nu mu puo kedi kezhau nunu, ratsa nu tase tsiepfüko mu tsiekhie kerkoko pfhütuo, puoe kijüu kechüshütuoü kesie ki.

²² U nyhüki nu rübei u kehaketuo themiau kinu rüreitacie, uko sü kedipuo mu?