Isaya 18 - Angami Naga CL (Re-edited) Bible (BSI)

Ethiopia Dze Pukeshü

¹ Ce! Ethiopia rüko tse kepratsa keba, puoshüko pfhe vüvü chü keba kijü,

² Zohepfü pie kechü rou geinu Nail rü ze di dielie ketsekeshüko! Volie, nie ta kevi dielieko, rükrie mu mejukecü seyie puo ki vocie, lutsahatsa mia u prei, kuo mu mia penyükelie seyie puo, kerü bu u kijü pfüthekecü kro puo.

³ Nie kijü nu lhou keba pete, nie kijüu gei bayakezhako, kijüthouko gei zasi puo pesiekeshü ki, mehoshücie! Ketsü khoukeshü ki, rünyüshücie.

⁴ Jihovae a ki pukecü: Ae niaki kele kemesa tuoi, lieyie ki kele nu thezei kimhou puo tuoi, kemekrie di a thuo a ba nunu meho batuo.

⁵ Puosi kerie mhodzü puopou pouwa di, puopouue khubesi rüchü parlie tse, puoe zhiepfhinuo pie puo nuotheko, mu puoco kra kezhüko tawatuo.

⁶ Süko pete khapie kijüthouko gei mha tekecü rako mu kijü nu ketuo nhachüko tsüwatuo. Sidi mha tekecü rakoe süko pie teile ca chütuo, mu kijü ketuo nhachükoe teisei gei ca chütuo.

⁷ Süki themia rükrie tsiu mejukecüko, kepecie mu kepenuo nu mia u kepreiko, kuo mu mia penyükelie seyie puo, kerüko bu uko kijü pfüthecü puo kinu mha methuo vieko se vor krodiko Jihova za thechüu, mu Zion kijüthouu geinu krodiko Jihova tsütuo.