Isaya 17 - Angami Naga CL (Re-edited) Bible (BSI)

Damaska Dze Pukeshü

¹ Damaska dze pukeshü die puo. Harie, Damaska nadi puo chü sa motatuo, di mha vakewa khru puo chütatuo

² Puo nadiko kechachie la vawatuo; sükoe tekuokro tuo chütatuo di uko thuo zhü rei miapuorei uko chü kemide motatuo.

³ Efraim dahouu jütatuo, mu Damaska nu kedirüvieko rei; mu Siria nunu lhiekelieko Israel nuonuo zayieu mhietuo, krodiko Jihovae siya.

⁴ Sünhie Jakob zapuzayieu bie kerünuowatuo; mu puo chü puo tshupfü kebako we votatuo.

⁵ Sidi liekereu telhako re kengukecü mhie, siro puo bou pie telhakre kere tuoi mu Refaim Razhau nu siekepfhü mhietatuo.

⁶ Oliv si vüriecü ki si keniekese puoco kerükrietho gei kezha zoketa mhiei, nhasibo coko gei si diapengou kezha zotayakecü mhiei, sügei rie pesha bakecü zotatuo, Jihova Israelko Kepenuopfüe siya.

⁷ Sünhie themiakoe u Chükeshüu rhutuo, mu uko mhi-e Israel Kemesau mehotuo;

⁸ ukoe uko dzie pie chükelie ruosuobako se ketherhu motatuo, mu ukoe uko dziekinuo pie chükelieko meho motatuo, Asherako shierei morei niaki miarhi ruosuobako shierei.

⁹ Sünhie kuokeba uko napfünadiko, Hivko mu Amorko kijü Israel nuonuo la vawaketa mhietatuo, mu mekriemeza motatuo.

¹⁰ Noe n kelakelie Kepenuopfü rükra moketa la mu n keya tsiekrieu rükra moketa la; süla noe sei kezivi leishü shierei, mu solhimia rhuo pie thuphe zhü rei,

¹¹ no uko leikeshü nhie uko bu memielie rei, tsia prukeshü duü puo bu pou parlie zorei, sirei nousuo mu menelie kelho kechü kevor nhie lieyieu tatatuo.

¹² Ce! themia kekra pfhe meliepie dzükezha kemeho mhiei! Ce! seyieko kemeho pfhe, ukoe mehopie dzükezha kemeho tuoishüzhie!

¹³ Seyiekoe dzü kekra krukezhü kemeho tuoi mehozhie, derei puoe uko ruoshütuo, mu ukoe ta pecietatuo, teikhrie bu kijüthou gei shübe hekeshü tuoi, mu khriedi bu nyophe he kevekeshü tuoi,

¹⁴ Thevatie, mehocie, kemerie! Teiso mhodzü süko ba sa mote. Hie pekapemhekecüko ya sü hai zotuo, mu hie vie vayakecüko ya rei.