Isaya 16 - Angami Naga CL (Re-edited) Bible (BSI)

¹ Sela nunu, kijükesia chau ze di, uko bu tekuonuo ketsepie Zion nuopfü kijüthouu gei rüna peyuu ki shücie.

² Moab nuopfüko sü Arnon dzü ciekepfüko nu pera shüphra keba tuoi zo, pera nuonuo kezakezi ketuo mhie zotuo.

³ “Mharhükesi khashücie; kethoca khashücie, Khinhieluo ki n khrüu chüpie theva tuoi zolie; mia thikewako kevielie, ta ketuoko teshü hie;

⁴ Moabmia thikewako bu nie donu lhoulie; kepekau kinu uko keyau chüliecie.” Mia pesekecüu tuo mota tse, mu kepeka sa mota tse, tsiu mha pekayakezhamia kijü nu ba mota tse,

⁵ Rüdirüli kemo kekhrie nu kediba puo David pfhekiu nunu chülietuo, mu sügei kedietho nu ke batuo, kethocau pfhüketuo, mu mha puotouu chü mhaishüketuo, kedi puo batuo.

⁶ Hie Moab kemiakokecü sishüte, puo kide ko shi! puo kemiavikecü, puo keko, mu puo mholieko; puo melhako kemeda phre.

⁷ Süla Moab bu kralie, mia pete bu Moab la kralie. Kralie, u noumezhie ketho di kralie, Kir-hareset khube niekhrüdako la.

⁸ Heshbon lieko rüwi zhüte, mu Sibma khubeboko rei sa, seyie kediko va puoe puo coko la meze, süko vo Jazer tso di vazie zo kijükesia nu vo; puo nuotheko kra pezhase chazou dzükezha mho rei vomu ru.

⁹ Süla ae Sibma khubeboko la Jazer kekra ze kra; he-i Heshbon mu Eliale, a mhidzü pie n tsheshüzhie, nnie nhasi tsiu telha lieyie la shiekeshü jüte.

¹⁰ Puosi vükelie lieu nunu kenei mu thenou kemvü chüsete; mu khubelie nu rei keli tuo mote, shiekecü puorei tuo mote; miapuorei khubedzü kethebou nu the sa mote; khube lieyie pfheu pesikhuoite.

¹¹ Süla übou puo tuoi Moab la a meloue mede bate, mu a ruopfüe Kir-heres la rei.

¹² Moab puo thuo vor rei, puo thuo thechü kerükrie geinu kemezhie rei, kecha chütuo üdi kemesachüu nu vo rei, puo thalie lho.

¹³ Hau Moab dze Jihovae pedzü pukeshü dieu.

¹⁴ Derei tsie we Jihovae puya, zhakramia teicie kephrü zho nu, cie se donu, Moab sü puo themia thuo kra phi zorei; puo kezha pie zhase chüwatuo, siro lhiekelieko tsa phi mu thachü phituo.