Isaya 15 - Angami Naga CL (Re-edited) Bible (BSI)

Moab Dze Pukeshü Die

¹ Moab dze pukeshü. Khuzhü puo nu Ar pekawaketa la, Moab we chülie lhote; khuzhü puo nu Kir pekaperuowaketa la, Moab we chülie lhote.

² Dibon-e kratuo üdi rüsuoki, thechü kerükrieu gei khote; Nebo mu Medeba la Moab-e thekrü chü ba. Pete u tsü piete, pete u tiemie thie phrewate;

³ chadiko nu ukoe gakhropfhe se u phapfü; kitsüle gei mu kitiezhako nu mia pete kra mu u mhidzü krü tuote.

⁴ Heshbon mu Eliale shieshü, unie pfhe-e Jahaz ketso si vo; süla Moab pfhephrie metei mota; puo meloue peta.

⁵ A noue Moab la kra ba; puo kitakoe ta Zoar nu vota, Eglat-shelishiya nu vo tso. Luhit nu kekho ki uko kra kho tso; Horonaim kevo cha nu ukoe mha pekakecü pfhe puo chüshü.

⁶ Nimrim nu dzüko thedzükezei chüte; nhako rüwite, nha the kesalie mote, nha kepejo tuo mote.

⁷ Süla uko mha kekra kengukelieko, mu uko kengukelieko keta se Sopfüciekhrie Rü cie vote.

⁸ Mhapfhe puo Moab kijü whi vota; kekra pfheu Eglaim tsote, kekra pfheu Ber-elim tsote.

⁹ Dibon dzüko thezie thuo tshu; derei a Dibon gei tsie rei sashütuo, Moabmia takelieko la, mu kijü nu lhiekelieko la losha puo se vortuo.